Мемлекет басшысы Қасым-Жомарт Тоқаев Ұлттық қоғамдық сенім кеңесінің VI отырысында сөз сөйледі, деп хабарлайды Egemen.kz.
«Саяси өзгерістер жүйелі әсер етеді. Сіздердің тікелей қатысуларыңызбен елді одан әрі демократияландыруға бағытталған реформалардың 4 пакеті әзірленді», деді Қасым-Жомарт Тоқаев отырыс барысында.
Президент жағдай бойынша мысалдар келтірді.
«Сайлау тізіміндегі әйелдер мен жастар үшін 30% квотаның енгізілуі партиялардың жұмысқа деген көзқарастарын қайта қарауға итермеледі. Егер бұрын осы санаттағы азаматтардың партиялық тізімдегі үлесі 20%-дан аспаса, квота енгізілгеннен кейін ол 34%-ға жетті», деп атап өтті Мемлекет басшысы.
«Әйелдер мен жастардың өз әлеуетін іске асыру үшін қосымша мүмкіндіктері пайда болды. Бірақ біз одан әрі қарай жүреміз. Енді гендерлік және жастар квотасы партияның депутаттық мандаттарын бөлу кезінде де жұмыс істейтін болады», деп түйіндеді Президент.