Ахмет Байтұрсынұлы атындағы Қостанай өңірлік университетінің SMART-орталығында өңір жастарының Tayelsizdik urpagy стартап-конкурсы мәреге жетті. Байқау мамыр айында жарияланып, оған қатысуға облыс мектептерінің жоғары сынып оқушыларынан, колледждер мен жоғары оқу орындарының студенттерінен жүзге тарта өтінім келіп түскен.
Осылайша, конкурстың бірінші кезеңіне өткен ІТ-жобалар, ауыл шаруашылығы, тұрмысқа қажет құралдар мен технологиялар, мобильді қосымша, экология, өндірісті автоматтандыру, тамақ өндірісі сияқты салалар бойынша 63 бизнес-жоба қаралып, олардың ішінен ең үздік деген 19 жұмыс іріктеліп алынды.
Финалдық кезеңнің қорытындысы бойынша ұн мен крахмалдан ыдыс жасаудың ерекше өндірісін ойлап тапқан Қостанай политехникалық колледжінің студенті Карина Ромах бірінші орын мен 500 мың теңгелік ақшалай сыйлықтың сертификатын алды. Жітіқара политехникалық колледжінің студенті Иван Базаркин Bailanys.Conferencing атты бейнеконференция өткізуге арналған жаңа жүйе ұсынып, екінші орынға лайық деп танылды. Жүлдегер 300 мың теңгенің сертификатына ие болды. Ал үшінші орын мен 200 мың теңге ақшалай сыйлыққа ие болған А.Байтұрсынұлы атындағы Қостанай университетінің түлегі Ақылбек Аралбаев Golden Wear қазақстандық бренд киімдерінің үлгісін көрсетті. Ісмердің айтуынша, бұл киімдерді ТМД елдеріне экспорттауға болады.
Ал Қостанай политехникалық колледжінің оқытушысы Еркебұлан Төлегенов «Үміт күттіретін жоба» аталымы бойынша жеңімпаз атанды. Smart mirror деп аталатын басқарылатын интерактивті айна жасап шыққан Еркебұлан өз өнімдерін Қостанай университеті Smart-орталығының сауда алаңына бір жыл тегін орналастыратын болады.
Қостанай облысы