Қазыналы өңірде қуатты серпін бар

Қарағанды облысының әкімі әңгімесін өңірдегі эпидемиялық жағдай туралы қысқаша баяндау­дан бастады.

– Соңғы айда облыс бойынша коронавирус инфекциясымен ауыру 2,3 есе азайды. Қараша айын­да вирус жұқтырғандар саны тұрақты көрсеткіш аясын­­да. Соған байланысты ауруха­на­лардағы инфекциялық орындар­дың жүктемесі 35%-дан 22,9%-ға дейін қысқарды, – деп атап өтті Ж.Қасымбек.

Өңір басшысы коронавирус инфекциясы азая бастаса да, пан­­демияның жаңа толқыны жағ­­дайына әрқашан дайын болу керегін айтып өтті. Резервте 44 стационар мен 8 мыңнан ас­там медицина қызметкері бар инфра­құрылымның дайындығы қамтамасыз етілген. Бұл ретте жоспарлы медициналық көмек­ті толық көлемде көрсету сақта­лады. Облыста коронавирус ин­фек­циясына қарсы жаппай иммундау жалғасуда. Бұл үшін облыста жеткілікті мөлшерде вак­ци­налық препараттардың ассортименті бар. Биылғы 29 қара­шадағы жағдай бойынша өңірде иммундаумен жалпы қамту 64,8%-ды құраған.

Облыстың әлеуметтік-эко­но­ми­калық дамуы бойынша айтқан­да, облыс әкімі биылғы 10 айдың қорытындылары бойын­ша экономиканың барлық негізгі салалары бойынша оң көрсет­кіштерге қол жеткізілгенін мәлімдеді. Өнеркәсіп өндірісі 0,1%-ға өсіп, 3,4 трлн теңгеге жетті. Оның ішінде, қара металлургия 12,4%-ға, жеңіл өнеркәсіп 11,9%-ға, фармацевтика 5,8 есеге өсті.

Облыс басшысының айтуынша, бүгінде өңірдегі тұрғын үй құрылысының қарқыны Тәуел­­сіздіктің барлық жылдары ішіндегі көрсеткіштерінің ре­корд­­т­ық деңгейіне шыққан. Жыл қорытындысы бойын­ша 662 мың шаршы метр тұр­ғын үйді пайдалануға беру жоспар­ланған. Бұл өткен жылмен салыс­тырғанда 25%-ға артық. Алдағы уақытта 2 600-ден астам отбасы мемлекеттік арендалық және кре­диттік тұрғын үй алады, оның ішін­де 621 көпбалалы отбасы бар.

Инвестициялық тартымды өңір болып саналатын облыста 2021 жылдың соңына дейін инвестиция көлемін 740,3 млрд теңгеге дейін жеткізіп, 14 жаңа өндіріс есебінен 2 мыңға жуық жұмыс орнын құру жоспарланған. Оның жетеуі қазірдің өзінде іске қосылды.

– Биылғы 10 айдың қорытын­дысы бойынша, жоспарларда белгіленген көрсеткіштерден озып келеміз деп нық сеніммен айта аламын. Негізгі капиталда 607 млрд теңгеден астам қаражат бар, оның 73 пайызы – жеке инвес­тициялар, – деп атап өтті спикер.

Облыста Мемлекет басшысы­ның тапсырмасына сай, моно­қа­лалардың экономикасын әр­тараптандыру бойынша бел­сенді жұмыс жүргізіліп жат­қаны айтылды. Мысалы, Саран қаласындағы бұрынғы РТӨ зауытының алаңында «Индустриялық ай­мақ» құрылған. Қазірдің өзінде «Ютонг» маркалы автобустар шығаратын зауыт жұмыс істейді. Ресейлік «Татнефть» компаниясымен бірге KamaTyresKZ автомобиль шиналарын шығаратын зауыттың құрылысы жүргізілуде. Зауыт келесі жылдың қараша айын­да іске қосылмақ.

Биылғы 20 қазанда Қазақстан Республикасы Президентінің қатысуымен Жәйрем кен-байыту комбинатының жаңа полиметалл фабрикасы іске қосылды. Кәсіпорында жылына 5 млн тоннаға жуық кен өңделеді. Жаңа фабрика моноқаланы келешекте 100 жылға дейінгі жұмыс перспективасымен қамтамасыз етеді.

Баспасөз мәслихатында өңір басшысы Қарағанды облысында «Ауыл – ел бесігі» жобасы бойынша соңғы үш жылда 38 ауылдық елді мекенде жолдар жөнделгенін мәлім етті. Сондай-ақ өңірде 1,5 мың шақырым автожол жөндеуден өткен.

– Республикалық маңызы бар 674 шақырым трассаны және жергілікті желінің 800 шақырымнан астам автожолын реконструкциялау жалғасуда. Жалпы ұзындығы 513 шақырым болатын Қарағанды – Балқаш және Балқаш –Бурылбайтал жаңа жолымен жүру қамтама­сыз етілді. Индустрия және инфра­құрылымдық даму министр­лігінің мәліметінше, бұл жұ­мыстарды келесі жылға толық аяқтау жоспарланған, – деді Ж.Қасымбек.

Сондай-ақ ол келесі жылы Жезқазған – Қызылорда автожолы бойынша  Қарағанды облысының учаскесінде жол-құрылыс жұмыстары басталуы тиіс екендігін хабарлады. Сапалы жол Жезқазған мен Сәтбаевтың сауда-көлік байланысын күшейтуге, сондай-ақ жүк транзитін арттыруға мүмкіндік беретінін атап өтті.

Ж.Қасымбек Қарағанды облысында баламалы энергия үле­сінің артқанын атап өтті. Бүгінде өңірде 5 күн электр стансасы, 2 биогаз қондырғысы мен шағын ГЭС жұмыс істейді. «Жасыл» энергетиканың жалпы қуаты 200 мегаваттан асқан.

– Жаңартылатын және баламалы энергетиканың жаңа көздерін белсенді түрде салу жүріп жатыр. 228 МВт-қа 8 жоба іске асырылды. Балқаш маңында 100 МВт күн электр стансасы салынуда. Саран қаласында 100 МВт және одан жоғары жинақтауыштары бар гибридті күн стансасының құрылысы жос­парлануда, – деп мәлімдеді облыс басшысы.

Сонымен қатар ол «Жасыл» энергетика жобалары шетелдік компаниялардың қатысуымен жүзеге асырылып жатқанын, құйылған инвестициялардың 100 млрд теңгеден асқанын атап өтті.

Облыс әкімі Қарағанды облысында балалардың спорт мек­тептеріне тегін кіруіне мил­лиард­тан астам теңге бө­лін­ге­нін баян етті. Жан басына қар­жыландыру жобасы спорт­­тың 17 түрі бойынша секцияларға 5 мыңнан астам жас қарағандылықтарды тартуға мүмкіндік берген.

– Дене шынықтыру мен спорт­тың қолжетімділігі жаңа спорт алаңдарын салу есебінен қамтамасыз етіледі. Биыл облыста 13 ірі спорт нысаны салынуда. Оның төртеуі аяқта­лу сатысында. Аталған 4 нысан – Ұлы­тау ауданының Қарсақбай ауы­л­ын­дағы ДСК, Жаңаарқа ауда­нының Жаңаарқа кентіндегі бассейн, Нұра ауданының Нұра кентіндегі көпбейінді спорт ке­шені және Қарағандыдағы Қанат Байшолақов атындағы спорт кешені, – деп атап өтті Ж.Қасымбек.

Облыста оқушы орындарының тапшылығы мәселесі де шешімін оңынан табуда. 2025 жылға қарай 17 мектеп салынады. Оның төртеуі биыл салынады. Бүгінде 166 ауылдық мектепте жөндеу жұмыстары жүргізілді. 2025 жылға дейін тағы 299 оқу орнын жаңғырту жоспарда бар.

– Қазіргі уақытта халықтың әлеуметтік осал топтарынан шыққан балалар қашықтықтан және дербес жұмыс форматында оқыту үшін компьютерлік техникамен толық қамтамасыз етілген. Сонымен қатар 1- 4 сынып оқушылары тегін ыстық тамақпен қамтылған, – деді өңір басшысы.

Сонымен қатар ол өңірде ерекше балаларды әлеуметтік қолдауға көп көңіл бөлінетінін айтты. Келесі жылы аутистік спектр бұзылысы бар балаларға арналған оңалту орталығының ашылатынын атап өтті.

Өңірде мал шаруашылығын­дағы өндірістің артуы есебінен ауыл шаруашылығында тұрақты өсім байқалады. Биылғы қиын­дықтарға қарамастан, дәнді да­қыл­дардың жақсы және сапалы өні­мін жинауға мүмкіндік туған.

– Биыл 940 мың тоннадан астам жоғары сапалы астық бас­тырылды. Оның ішінде 1 және 2 сыныпты 600 мың тоннадан астам бидай, 410,5 мың тонна картоп және 109,5 мың тонна көкөніс жиналды, – деді спикер.

Сонымен қатар астықтың, картоптың және көкөністердің резервтік және тұрақтандыру қорлары құрылған.

Облыс басшысы Қарағанды облысында орталық сумен қала тұрғындарының 98%-ы және ауыл тұрғындарының 89,9%-ы қамтылғанын атап өтті. Мем­лекеттік бағдарламалар өңірдің шалғай елді мекендерінде де су мәселесін шешуге көмектесе­ді. Сумен жабдықтау сапасын жақсарту үшін 35 инфрақұ­рылымдық жоба іске асырылуда.

– Президенттің тапсырмасына сәйкес, келесі жылы Үйтас-Айдос суағарын қайта жаңарту бойынша жобаны іске асыру басталады. Бұл Жезқазған тұрғындарын Қожамсейіт кен орнынан сапалы сумен қамтамасыз етеді. Ал биыл Сәтбаевты сапалы ауыз сумен қамтамасыз ететін Есқұла су тартқышы іске қосылды, – деді Ж.Қасымбек.

Сонымен бірге өңір басшысы облыста газдандыру жұмыс­тарының жалғасып жатқа­­нын хабарлады. Көгілдір отын Қара­ғанды өңірі тұрғындары­ның         3 мың үйіне жеткізілген. Жа­­қын­да Қарағанды, Теміртау жә­не Жезқазғанның алғашқы або­ненттерін газбен жабдықтауға қо­су басталмақ. Ал тарифке кел­­­сек, оның 1 текше метрі 40,8 тең­­гені құрайды.

Сондай-ақ Саран қаласына газ құбыры салынуда, жұмыстарды желтоқсан айының соңына дейін аяқтау жоспарлануда. Нау­рыз айы­нан бастап Жаңаарқа, Оса­­каров аудандарында және Шах­тинск қаласында желілер құрылысы басталады.

Қарағанды облысы