Қазақ қызының Париждегі жеңісі

Алматылық мектеп оқушысы Мәлике Бектұрова Франция астанасындағы скрипкашылар сайысында талғампаз қауымды таңғалдырды Скрипкашылардың Алек­сандр Глазунов атындағы сегізінші халықаралық конкурсына Англия, Бельгия, Грузия, Қазақстан, Қытай, Латвия, Өзбекстан, Франция және Оңтүстік Корея сияқты елдерден елуге жуық талапкер келіп, Париж консерваториясының үлкен концерттік залын күй-думанға бөледі. Қазақстандық скрипка өнерінің өкілдері осынау кірпияз байқауға алғаш қатысып тұрса да, олардың сиқырлы аспаптағы құйқылжыған ойыны еуропалық классикалық музыка білгірлерін бірден баурап алды. Беделді жюри бірінші орын­­­ды Күләш Байсейітова атындағы республикалық маман­­­дандырылған музыка мектебінің 6-сынып оқушысы Мәлике Бектұроваға беруді бірауыздан ұйғарды. Осы мектептің 10-сынып оқушысы Наргиз Ма­медова жүлделі үшінші орынның дипломымен марапатталды. Айта кетсек, Мәлике Бек­тұ­рова бұдан бұрын да Астана мен Алматыда өткен бірқатар халықаралық конкурстардың лауреаты атанған еді. Балғын жас скрипкашы үлкен сахнаға алғаш рет 7 жасында шығып, сол кездің өзінде күрделі бірнеше композицияларды мінсіз орындап, өз шеберлігімен отандық мэтрлерді ғана емес, сонымен бірге, П.И.Чайковский атындағы Мәскеу консерваториясының профессоры Владислав Иго­линскийді де сүйсіндірген болатын. Скрипка бойынша ұстаз Құралай Ахметованың айтуынша, осы жолы француздық маэс­тролар – Париждің жоғары музыка мектебі оқытушыларының таңдануына тура келген. Мә­­ликенің пьесалардан, этюдтер мен концерттік сололардан тұратын үлкен бағдарламаны тамаша орындағаны соншалық, зал оған: «Браво!» деп қолпаш білдіріп, орындарынан тік тұрып құрмет көрсеткен. Жас қыздың шетелге шыққан бетінде-ақ мұншалық мәртебелі музыкалық конкурста Қазақстанның намысын қолдан бермей, лайықты қорғағаны қуантады. Сондай-ақ, шетелдік сарапшылар біздің жас талаптардың кәсіби деңгейі Еуропадағы танымал скрипка мектебінің өресінен бір де кем еместігін атап көрсетті. Скрипка ойнаудағы жоғары шеберлік машығына алғыс-мара­пат ретінде конкурсты ұйым­­­­­дас­тырушылар Мәликені Монб­лан­дағы жазғы халықаралық семинарға шақырды. Онда скрипка өнерінің профессорлары, әлемдік тұлғалар шеберлік сыныптарын өткізеді. Сабақтардан бөлек, жас таланттардың кон­церттері мен жеке өнер кештері жоспарланған. Қазақтың дарынды скрипкашы қызы үшін бұл да өз өнерін шыңдаудың тамаша мүмкіндігі болмақ. Қорғанбек АМАНЖОЛ, «Егемен Қазақстан». АЛМАТЫ. Суретте: Парижді таңдан­дырған Мәлике Бектұрова.