«Проммашкомлект» ЖШС өндірісті жаңғыртуды аяқтады, деп хабарлайды Egemen.kz.
Бұл туралы Екібастұз қаласының әкімі Ардақ Қаңтарбаев Өңірлік коммуникациялар қызметінде «Екібастұз қаласының әлеуметтік-экономикалық дамуы» тақырыбында өткен баспасөз конференциясында айтты.
Биыл «ФерроТрансТрейд» ЖШС серпімді клеммалары мен рельстік бекіткіштеріне арналған жол бұрандасын шығаратын зауыт іске қосылады. «Проммашкомлект» ЖШС өндірісті жаңғыртуды аяқтады. Бұл зауыттың өндірістік қуатын арттырып, жылына 300 мың теміржол дөңгелегін шығаруға мүмкіндік береді. Әкімнің айтуынша, жаңа сегіз өндірісті іске асыру үшін әлеуетті инвесторлар бар. Ағымдағы жылы ферроқорытпалар өндірісі бойынша металлургия саласына «Fesil GROUP», «Mineral Product» және «EkibastuzFerroAlloys» жобалары тартылды.
«Жалпы кешенді жоспарды іске асыру қорытындысы бойынша 2025 жылға қарай экономиканың ОЭК-ке тәуелділігін 12,1%-ға төмендетіп, негізгі капиталға салынған инвестициялар сомасы 737 млрд теңгені құрайтын болады. Шағын және орта бизнес субъектілеріне мемлекеттік қолдау шараларын ұсыну шеңберінде жұмыс істеп тұрған субъектілердің санын 8,5-тен 10,0 мың бірлікке дейін ұлғайту жоспарлануда», деді Ардақ Қаңтарбаев.
Еске сала кетейік, қараша айында Президент Қасым-Жомарт Тоқаев Екібастұзға жұмыс сапары барысында серпінді клеммалар мен бұрандалар шығаратын «Ферротранстрейд» зауытын іске қосқан болатын.