Қазақстанда мобильді банк қосымшаларының жұмысы қалпына келтіріліп жатыр, деп хабарлайды Қазақстан Ұлттық банкінің баспасөз қызметі.
«Мемлекет басшысының қаржы жүйесін тұрақтандыруды қамтамасыз ету бойынша тапсырмасын орындау барысында Қазақстанның Ұлттық банкі Цифрлық даму, инновациялар және аэроғарыш өнеркәсібі министрлігімен және басқа да мүдделі мемлекеттік органдармен бірлесіп, екінші деңгейлі банктердің мобильді қосымшаларын қалпына келтіру бойынша жұмыстар жүргізді», делінген хабарламада.
Оған сәйкес, еліміздегі ірі банктердің - Halyk Bank (Homebank қосымшасы) пен Kaspi.kz клиенттері мобильді қосымшаларды интернетке кірмей-ақ қолдана алады. Ол үшін мобильді байланыс болуы шарт. Соның ішінде, Алматы қаласының тұрғындарына да банк қосымшалары қолжетімді.
Тұрғындар әдеттегідей қосымша арқылы есеп айырысып, мобильді төлемдер және басқа да қажетті операциялар жүргізе алады.
Қазіргі уақытта басқа да екінші деңгейлі банктердің мобильді қосымшаларын қалпына келтіру жұмысы жүріп жатыр.