Вирусты таратушыларға тосқауыл

– Биылғы қаңтар басталғалы бері 5 мыңға жуық науқас тіркелді. Талдау көрсеткендей, қаңтардың алғашқы аптасында – 59, екінші аптада – 130, үшінші аптада 1 936 адам коронавирус инфекциясын жұқтырды. Ал соңғы аптадағы статистикаға сүйенсек, науқастар саны 2 448-ге жетті, – дейді Әсел Мұқаева.

Қазір инфекциялық стационарларда 362 науқас ем қабылдап жатыр. Олардың арасында 76 жүкті әйел бар. Ал өз үйінде 6 788 адам қауіпті вирустан ем-дом алу үшін оқшауланған. Жансақтау бөліміндегі 19 науқастың 4-еуі өкпені жасанды желдету аппаратына қосылды.

Ал 25 қаңтарда Жылыой ауданының бас санитар дәрігері Т.Хабибуллиннің қаулысымен «Теңіз», «Прорва», «Морской» және оларға іргелес басқа да кен орындарында карантиндік шектеу шаралары қайта күшейтілді. Соған сәйкес көлікте, кеңселерде, асханаларда (тамақ ішу уақытын қоспағанда), тұрғын блоктарда және басқа да жабық өндірістік емес нысандарда бетперде кию тәртібін орындау, инфекция жұқтырған адамдарды бақылауға арналған оқшаулауға байланыс­ты карантин режімінің сақталуын қамтамасыз ету ұсынылған. Әсіресе «Теңіз» кен орнына бөгде көлік құралдарының кіріп-шығуына тыйым салынды. Ілеспе құжаттамасы жоқ, өту уақыты, қозғалыс маршруты мен қажет болған жағдайда қайту уақыты тіркелмеген көлік құралдарының қозғалысына жол берілмейді.

Осындай күрделі эпидемиялық ахуал қалыптасқан Атырауға Спутник Лайт вакцинасының 3 мың до­за­сы жеткізілді. Облыстық денсаулық сақтау бас­қар­масының басшысы Асхан Байдуәлиевтің түсін­ді­руінше, Ресей Федерациясында шығарылған вак­ци­на­ның дозалары Атырау қаласындағы №1, 2, 3, 4, 5, 7, Геолог, Дамбы және Еркінқала елді ме­кен­де­рін­дегі емханаларда, сондай-ақ жеті аудандық ор­талық ауру­хананың егу пункттеріне таратылды.

Атырау облысы