Президент Қасым-Жомарт Кемелұлы Тоқаев Үкіметтің кеңейтілген отырысында сөйлеген сөзінде Жаңа Қазақстанды құру үшін түсінікті әрі әділ мемлекеттік саясат жүргізілуі керектігін, мұндай саясаттың бәсекеге және технологияға негізделген экономиканы қалыптастыратынын атап көрсетті.
Сайып келгенде, әлемдік бәсекеге қабілетті және заманауи инновациялық технологияға арқа сүйейтін экономиканы орнықтырып, оның үнемі ілгерілеп отыруы үшін ең әуелі, мемлекеттік шаруашылықтың барлық саласында өз ісін жетік білетін білікті мамандар қажет екені ақиқат. Бұл ретте Мемлекет басшысы атап көрсеткендей, жаңа экономика құру үшін жоғары оқу орындарының бәсекеге қабілеттілігін күшейтудің маңызы зор. Ендеше, кадрлар даярлау сапасын арттыру басты талаптардың бірі десек, отандық білім беру жүйесіне қатысы бар мекемелердің қайсысы болсын өз міндеттерін осы өлшем тұрғысынан бағамдауы, өмірдің өзінен туындап отырған шарттарға сай әрекет жасап, оң нәтижеге жетуді мақсат тұтуы керек деп ойлаймын.
Ұлт болашағы – білікті, мәдениетті, алғыр жастардың қолында. Білімі терең жас толқынның ел ішінде бәсекеге қабілетті бола алатыны, толайым табыстарға жетіп, лайықты өмір сүру үшін де мүмкіндігі жоғары тұратыны даусыз.
Мемлекет басшысының «техникалық мамандықтарға басымдық беріп, инженерлердің, өнеркәсіпшілердің жаңа буынын өсіруіміз керек» деген сөздерін әбден құптауға болады. Бұл бағдар студенттерге, жоғары оқу орындарының барша қызметкерлеріне ерекше жігер қосқанын атап өткім келеді.
Мемлекет басшысының жоғары оқу орындарында білім сапасын арттырудың барлық мүмкіндігін қарастыру және студенттерді жатақханамен қамтамасыз ету жөнінде берген тапсырмаларын жүзеге асыру – біз үшін бірінші кезектегі міндет.
Таяуда Қазақстан мен Ресей президенттерінің кездесуінде республикамызда инженерлік-техникалық сала бойынша жоғары білікті мамандардың қажеттігін ескере отырып, білім беру саласындағы ынтымақтастыққа ерекше мән берілді. Келіссөз қорытындылары бойынша қол қойылған құжаттардың дені білім беру, цифрландыру, ғарышты игеру және атом энергетикасы салалары бойынша мамандар даярлауға қатысты болды. Мұның бәрі барша қазақстандықтар үшін қуантарлық жайт.
Сөз жоқ, біз үмітпен күтіп отырған жаңа қоғамның халық мүддесіне сай дамуы үшін білікті, білімді, озық ойлы мамандар қажет. Біздің міндетіміз – осы мақсатқа қызмет ету.
Қасым-Жомарт Тоқаев: «Бәріміз тұтас ел болып, Жаңа Қазақстанды құрайық! Жаңа Қазақстан – баршамыздың ортақ үйіміз, оның іргесін бірге қалайық! Бұл өскелең ұрпақ үшін керек», деді. Президенттің бұл сөздерінен еліміздің алдында негізгі қандай міндет тұрғанын анық аңғаруға болады. Ал бүгінгі қоғамымыздың осы міндетті өз деңгейінде еңсеруге әлеуеті толық жететініне сенім мол.
Талғат ҚҰЛАЖАНОВ,
Алматы технологиялық университетінің ректоры,
Ұлттық ғылым академиясының академигі