Бүгін ҚР Төтенше жағдайлар министрлігі арнайы рейспен Украина азаматтары үшін гуманитарлық көмектің кезекті партиясын жеткізді, деп хабарлайды Egemen.kz.
«Қазақстан тарапынан жіберілген гуманитарлық көмек жалпы салмағы 17,5 тонна болатын жүк төсек-орын және тамақ сияқты қажетті заттарды қамтиды», делінген ҚР ТЖМ хабарламасында.
Бұған дейін Қазақстан жалпы салмағы 28,2 тонна болатын 17 түрлі дәрі-дәрмек, атап айтқанда: антибиотиктер, қабынуға қарсы дәрілер, жөтелге қарсы және антигипертензивті препараттар түрінде гуманитарлық көмек жіберген болатын.
Жүкті жеткізетін «Бүркіт» мемлекеттік авиакомпаниясының Ил-76 ұшағы елге қайтар жолда қазақстандық дипломаттардың көмегімен Украинадан Польшаға келген бірнеше ондаған Қазақстан азаматтарын алып кетеді деп жоспарлануда.