Елордадағы Ұлттық музейде көрнекті әдебиеттанушы ғалым, академик Серік Қирабаевтың құнды жеке заттары музей қорына табыс етілді.
Мазмұнды іс-шараға ғалымның ұлы, философия ғылымдарының докторы, академик Нұр Серікұлы Қирабаев, алаштанушы ғалым, академик Дихан Қамзабекұлы, Ұлттық музейдің бас ғылыми қызметкері, академик Жәкен Таймағамбетов және т.б. зиялы қауым өкілдері қатысты.
Іс-шара барысында Ұлттық музей директорының орынбасары Абай Сатыбалдин саналы ғұмырын қазақ әдебиеттану ғылымына арнап, ұлт руханиятына өлшеусіз еңбек сіңірген ғалымның еңбек жолы мен шығармашылығына тоқталды. «Серік Қирабаев − отыз жылдан аса уақыт Абай атындағы Қазақ ұлттық педагогикалық университетінде қызмет етті. Одан соң Мұхтар Әуезов атындағы Әдебиет және өнер институтын басқарды. Қазақ әдебиетінің тарихы мен теориясы жөнінде сүбелі еңбектер жазды. Нақтырақ айтқанда, 40-тан аса монография, 800-ден аса әдебиет сыны теориясы жөнінде мазмұнды мақала жазып, әдебиеттану ғылымының дамуына зор үлесін қосты», деді ол.
Содан кейін сөз алған ардақты ғалымның шәкірті, академик Дихан Қамзабекұлы Серік Қирабаевтың әдебиеттану абызы дәрежесіне жеткен бірегей тұлға екенін сөз етті.
− Әдебиет, мәдениет және білім саласы мамандары үшін «академик Қирабаев» атанған абзал азаматтың кемі алпыс бес жылдан асатын шығармашылық дәуірі ұлтымен бірге жасап, халқының рухани тағдырымен бірге өріліп келеді десек, жаңылыспаймыз. Әдебиет – ұлттық мәдениеттің бір саласы. Оның дамуы ұлттың тілімен, ділімен, ұғым-түсінігімен, парасатымен, дүниетанымымен тікелей бай-ланысты. Осының бәрі көркем туынды арқылы көрініп, халықтың санасына сіңген, оның рухани өмірін қалыптастырған, − деді ғалым.
Нұр Қирабаев әкесі туралы жылы естеліктерімен бөлісіп, отбасылық қорынан академиктің көзі тірісінде өзі тұтынған жеке заттарын, орден-медальдарын, кітаптарын музей қорына табыс етті.