Ұландықтар алғысқа бөленді

«Оңтүстік» өңірлік қол­бас­­шылығының әскери бө­лім­дері 4 жоғалған баланы тапса, «Шығыс» – 2, «Орталық» – 3, «Батыс» 3 кәмелетке толмаған жет­кін­шекті ата-аналарымен аман-есен қауыштырған. Жоғалған балалардың көп­ші­лігін елордалық 5573 әс­кери бөлімінің әскери қыз­метшілері тапқан. Олар 10 баланың есен-аман отбасына оралуына себепкер болған.

Өткен жылы елордада тіркелген соңғы оқиғаны алайық. Патрульдік топ­тың бастығы кіші сер­жа­нт Азамат Кәрімов пен қа­тар­­да­ғы жауынгер Сұңғат­ Жүкенов 6 қазан күні кешке маршруттарды тек­­с­еруге шығады. Қо­наев-Достық көше­ле­рінің қиылы­сын­да­ғы бағдар­ша­мға келгенде олар жал­ғыз өзі жүрген мектеп оқушысын көреді. Оқушы «Бәйтерек» мону­ментінің жанында үл­кен­дердің қарауынсыз жал­ғыз қалып қойған кө­рі­не­ді. Адасып кетіп, қат­ты қо­бал­жып тұрған бала өзінің нақты қайда тұра­ты­нын да айта алмаған. Сондықтан ұландықтар оны жақында орналасқан туристік полиция бекетіне апарады.

Кейіннен сегіз жасар оқу­шының ата-анасы оны сағат 16.00-ден бас­тап әлеуметтік желілер арқылы іздей бастағаны белгілі болады. Қаланың қалың нөпірінің ішінде адасып кеткен бала бірінші сыныпта оқиды екен. Сол күні оқушы ағасын мектеп жанында күтпестен өз бетінше ертерек кетіп қал­ған көрінеді.

Оқиға орнына келген анасы мен әкесі ұлдарының аман-есен табылғанына қуанып, Ұлттық ұланның әскери қызметшілеріне алғыстарын білдірді.

Дәл сол күні кешкісін Қошқарбаев көшесінің бо­йында құрамында қатар­да­ғы жауынгер Мұрат Қар­­жауов пен патруль­дік Алпамыс Нәби мен Саржан Қылыш­бай бар әскери жасақ 10 жасар қыз­ды байқап қалады. Балдырған қосымша сабақ­тан шыққаннан кейін жолдан адасып қалған. Тәр­тіп сақшылары қыздың әкесі­нің телефон нөмірін анық­тап, хабарласып, өз­де­рі тұрған жерді айтады.

Біраз уақыттан кейін азамат айтылған мекен­жайға келіп, әскери қыз­мет­ші­лерге, сондай-ақ Ұлттық ұланның 5573 әскери бөлі­мі­нің қолбасшылығына ал­ғы­сын білдірді.

«Балалардың жоғалу дерегі көбіне жазда жиі кез­деседі. Әсіресе, қалалық саябақтарда, мереке орындарында, отбасылық демалыс кезінде балалар қа­рау­сыз қалып қояды. Балалар әдетте бірнәрсеге алаңдап ата-аналарынан ажырап қалады, кейде басқа жаққа жүгіріп кетеді. Ата-аналар балаларын өз бетінше таба алмайтын жағдайлар көп. Әскери жасақтар әрқашан жалғыз жүретін балаларға назар аударады. Ұландық жауынгерлер олармен аман­дасады, сөйлеседі, кім­мен жүргендерін сұ­рай­ды. Балалар әскери фор­мадағы адамдарға сенеді. Сондықтан олар жоға­лып кеткенін немесе үйлеріне қарай жол таба алмай жүр­ге­нін жасырмай айтады. Мұндай кездері біз дереу шара қолданып, балаларды жақындарына қайтарамыз. Өйткені бала – әр ата-ана үшін ең қымбаты», дейді Ұлттық ұлан жауынгерлік қызмет Бас басқармасының аға офицері Ермек Тұрғы­нов.