Қазақстан мен Грузия Тбилиси қаласында сауда-экономикалық ынтымақтастық жөніндегі Үкіметаралық комиссияның 11-ші отырысын өткізді. Біздің делегацияны Индустрия және инфрақұрылымдық даму министрі Қайырбек Өскенбаев бастап барды. Грузия делегациясына вице-премьер, Экономика және тұрақты даму министрі Леван Давиташвили жетекшілік етті.
Қазақстан мен Грузия арасындағы дипломатиялық қарым-қатынастың орнағанына 30 жыл толды. Қ.Өскенбаевтың айтуынша, соңғы 16 жылда Грузиядан Қазақстанға жалпы тікелей инвестиция ағыны 285 млн доллардан асқан. Ал Қазақстан Грузия экономикасына 495,3 млн доллар инвестиция құйған. Өткен жылы екі ел арасындағы тауар айналымы 88 млн доллардан асты. Жыл басынан бері оң динамика сақталып отыр.
Министр екі ел арасындағы өзара сауда-саттықты арттыру үшін айтарлықтай әлеует бар екенін атап өтті. Қазақстандық компаниялар металлургия, мұнай-химия, тамақ және машина жасау, сондай-ақ фармацевтика сынды бірқатар салада өңделген тауарлар экспортын арттыруға дайын. Жалпы, экспорттық әлеует 170 млн долларға бағаланып отыр.
– Өнеркәсіп саласында грузиндік әріптестерімізді ынтымақтастыққа және Қазақстанда бірлескен кәсіпорындар құруға шақырамыз. Біз қолдау көрсетуге дайынбыз. Бүгінгі таңда елімізде Грузияның қатысуымен 248 бірлескен кәсіпорын жұмыс істейді, – деді Қ.Өскенбаев.
Индустрия және инфрақұрылымдық даму министрі қазір Қазақстанда белсенді индустриялық-инновациялық саясат жүргізіліп жатқанын, ал дамудың басым бағыттарының бірі бірлескен жоғары технологиялық өндірістерді енгізу екенін атап өтті.
– Әлемдегі күрделі геоэкономикалық жағдайға қарамастан, Қазақстанның инвестициялық ахуалы мен макроэкономикалық жағдайы тұрақты және инвесторлар тарапынан сенімге ие, – деді ол.
Пленарлық отырыс барысында қатысушылар Қазақстан мен Грузия арасындағы көлік, коммуникация, IT және инновациялар, ауыл шаруашылығы, мәдениет, спорт және туризм сияқты салалардағы ынтымақтастықтың жай-күйі мен даму перспективаларын талқылады.
Атап айтқанда, әдеттегідей Транскаспий халықаралық көлік бағытын (ХТР) дамыту перспективалары қарастырылды. Қ.Өскенбаев бұл бағытта қазақстандық экспорттың ұлғаятынын, оның ішінде Қытайдан транзиттің көлемі арта беретінін, осы орайда Грузия аумағы арқылы транзиттің ыңғайлылығын сақтай отырып, ынтымақтастықты одан әрі дамыту керектігін атап өтті.
Сонымен қатар қос тарап денсаулық сақтау саласында ынтымақтастық, атап айтқанда, білім және тәжірибе алмасу бойынша ұзақ мерзімді ынтымақтастықты нығайту және кеңейту бойынша ұсыныстарды қарастырды.
Үкіметаралық комиссияның 11-ші отырысының қорытындысы бойынша Қ.Өскенбаев пен Л.Давиташвили тиісті хаттамаға қол қойды. Сонымен қатар іс-шара аясында «Қазақстан Республикасының Мәдениет және спорт министрлігі мен Грузияның Мәдениет, спорт және жастар министрлігі арасындағы спорт саласындағы өзара түсіністік туралы» меморандумға, сондай-ақ стандарттау және метрология саласындағы ынтымақтастық туралы келісімге қол қойылды.