Сыртқы саясаттағы әріптестік көкжиегі

Алматы қаласында Қа­зақстан Республикасы Президентінің жанындағы Қазақстан стратегиялық зерттеулер институты мен Қазақстан Сыртқы істер министрлігі бір­лесе отырып, «Қазақстан Рес­пуб­ликасы сыртқы саясатының 2014-2020 жылдарға арналған тұжы­рым­дамасы және оның жүзеге асуының міндеттері» атты дөңгелек үстел өткізді. Қазақстан  – тәуелсіз мемлекет ретінде қалыптасқан кезден бастап әлемдік қауым­дастыққа тұрақты әрі қарқынды дамушы ел ретінде кеңінен танылды. Сондықтан да жиында  ынты­мағы мен бірлігі жарасқан, ха­лықаралық қарым-қатынасы мен сыртқы жағдайларға өзіндік үн қатқан Қазақ елінің сыртқы дүниемен араласу, қатынас жасау және өзінің ұстанымын нақтылау мәселесі әңгіме арқауына айналып, мемлекеттің келешектегі қадамы тиянақты түрде пысықталды. Алқалы жиында Сыртқы істер министрі Ерлан Ыдырысов баяндама жасады. Президент жанындағы Қазақстан Стратегиялық зерттеулер институтының басшысы Болат Сұлтанов «Ғаламдық және аймақтық жүйедегі Қазақ­стан Республикасының сыртқы сая­саты», ал Төтенше және өкілетті елші, СІМ-нің ерекше тапсырмалар жөніндегі елші­сі Ақмарал Арыстанбекова «Жаһан­дану жағдайындағы Қазақ­стан­ның жан-жақты диплома­тиялық қатынасы және алдағы мүмкіндіктері» деген тақырып­тарда баяндама жасап, еліміздің ұстан­ған саяси бағытын толық қамти­тын мағлұмат беріп өтті. Алыс-жақын 16 мемлекеттің елші­лері мен консулдықтар өкілдері қа­тысқан басқосуда, сондай-ақ, Стратегиялық зерттеулер институтының ғылыми бас маманы В.Додонов, Абылай хан атындағы Қазақ халықаралық қатынас және әлем тілдері университетінің профессоры С.Бөлекбаев, әл-Фараби атындағы Қазақ ұлттық уни­верситеті жанындағы Қауіпсіздік жә­не ынтымақтастық мәселелерін зерттеу институтының директоры К.Байзақов сала­лық тақырыптар бойынша сөз алып, қатысушылар сауалдарына жауап қайтарды. Дөңгелек үстел «Қазақстан Республикасы сыртқы саясатының мақсаты мен алға қойған міндеттері» және «Қазақстан Республикасы сыртқы саяси стратегиясының аймақтық мүмкіншіліктері мен негізгі ұста­нымы» деп аталған екі бөлімде жұмыс істеді. Еліміздің сыртқы саясаты ведомствосының басшысы  Ерлан Ыдырысов Қазақстан Республикасының 2014-2020 жылдарға арналған сыртқы сая­сат тұжырымдамасы өзге елдермен байланысты нығайтуға бағытталғанын, алдағы атқа­ры­лар негізгі жұмыс Латын Амери­касы мен Африка елдерінде жаңа байланыстарды ашуға жұмыл­дырылатынын атап өтті. Минис­трдің атап өткеніндей, Қазақ­стан Республикасы сыртқы саясат­тағы өзінің сыртқы байланыс­тарын кеңейтпек. Жаңа тұжырымдамаға сәйкес еліміз Латын Америкасы, Африка елдері сияқты жаңа саяси-экономикалық байланыстардың пайда болуын қамтамасыз ететін болады. «Қазір Қазақстанның өкіл­дері Бразилияда жұмыс істеп жатыр. Биыл біз Мексика мен Эфиопияда елшілігімізді аша­мыз. Бүгінгі таңда Кариб бассей­ні мен Латын Америкасы бізге жақындай түсті. Осы аймақ­тарда біз экономикалық қарым-қатынастарды барынша дамыт­пақпыз», – дей келіп министр еліміздің Африка құрлығына жылжып бара жатқан жаһандық ағыс­тан сырт қала алмайтындығын, қазіргі таңда Қазақстан Афри­ка­ның үш тарапынан, атап айт­қанда, оңтүстігі, орталығы және солтүстігі арқылы саяси-эконо­микалық қатынастарын жүргі­зіп отырғанын, оның мысалы ретінде Мысыр, Оңтүстік Африка Республикасында Қазақстанның елшіліктері жұмыс істеп тұрғанын атап, бұл бағыттың елімізге үлкен мүмкіншіліктер әкелетіндігіне ерекше тоқталды. Қанат ЕСКЕНДІР, «Егемен Қазақстан». АЛМАТЫ.