Дарияның екі бетіндегі елді мекендерді жалғайтын қалқыма көпірлер бар. Қыс мезгілінде бұдан келер қауіп жоқ. Ал көктем шыға, дарияның арнасы толған кезде қалқыма көпір арқылы өту қиындай түседі. Сондықтан Сырдариядағы нөпір су азайғанша мұндай өткелдерден көліктердің өтуі сирейді. Биылғы тасқын кезеңі Қызылордада ың-шыңсыз өтті. Бүгінде өзеннің қос қапталын байланыстырып тұрған қалқыма көпірлер де қалыпты жұмыс істеп тұрған. Дегенмен, Шиелі ауданының Қарғалы елді мекенінің тұсында оқыс оқиға орын алды.
Бұрнағы күні түс әлетінде «КазСтепСтройМонтаж» серіктестігіне қарасты «Howo» жүк көлігі қалқыма көпірге келеді. Көпірден өте бергенде Хайдарбек Сайтов тізгіндеп отырған жүк көлігі көпірмен қоса суға батып кетеді. Қуаныштысы, оқиға кезінде зардап шеккен немесе қайтыс болған ешкім жоқ.
Оқиға болған жерге Шиелі аудандық төтенше жағдайлар бөлімінің жедел тобы жеткен. Сондай-ақ, аудандық ішкі істер бөлімінің қызметкерлері де сол арадан табылған. Осылайша, 2 техника мен 6 адам жұмылдырылып, құтқару жұмыстарын жүргізген.
Ержан БАЙТІЛЕС,
«Егемен Қазақстан».
Қызылорда облысы.