Қызылорда қаласына қарасты Қарауылтөбе деген ауыл бар. Мұнда кеңес заманының кезінде 5 мың гектар жер ауыл шаруашылығын дамытуға қолайлы мекен ретінде құрылып, жоспарлы жұмыс жүрген екен. Ал бүгінде «Қазақкүріш» ғылыми-зерттеу институты аталған аймақта дәнді дақылдар егіп, тәжірибе жұмыстарын жүргізіп жатыр.
Институт қарамағына берілген 1200 гектар жерде көктемгі егіс жұмыстарына дайындық басталып кетті. Егістік алқабының 500 гектарына күріш, 492 гектарына жоңышқа егілетін болса, 100 гектар жерге ғылыми-зерттеу жұмыстары жүргізіледі. Қазірдің өзінде арпа, бидай, тары секілді дәнді дақылдар көгеріп, көктеп, өсіп келеді. Ал, қазір алқапта жоңышқа егу жұмыстары жүріп жатыр.
Институт құрамындағы малазықтық дақылдар селекциясының меңгерушісі Л.Тохетова жалпы егістік дақылдарының өзге елдерден әкелінген және жергілікті үш мыңдай сорты бар екенін айтады. Биылғы егістік науқанында 2 сорт тәжірибеден өткізілмек. Сонымен қатар, «Шахристан ячмин» дәнінің жаңа түрі ойлап табылған. Ғалымның айтуынша, бұл дәнді дақыл «Өсімдіктер биологиясы және биотехнологиясы» институтымен бірлесе отырып шығарылған.
Сондай-ақ, биылғы егістік науқанына Қорқыт Ата атындағы мемлекеттік университетінің агрономия мамандығының 2-курс студенттері тартылған. Олар бұл жерде алған білімдерін тәжірибемен ұштастырады.
Ержан БАЙТІЛЕС,
«Егемен Қазақстан».
Қызылорда облысы.