Қазақстан жайында қалам тартқан шетелдік журналистер арасында конкурс өтетін болды. Бұл туралы Қазақстанның АҚШ-тағы елшілігіндегі дереккөзіне сілтеме жасаған egemen.kz тілшісі хабарлады.
Аталмыш елшілік өкілі Нұрғали Арыстановтың айтуынша, Сыртқы істер министрлігі мен Қазақстан Журналистер одағы бірлесе жариялаған конкурсқа Солтүстік және Оңтүстік Америкадан, Еуропа мен ТМД елдерінен, Таяу Шығыс пен Азиядан, сондай-ақ Австралиядан журналистер қатысады. Олар Қазақстанның экономикасы, сауда қатынастары, мәдениеті мен дәстүрі, туризмдегі әлеуеті мен ел тарихы турасында материалдар әзірлеп, үстіміздегі жылғы 15 маусымға дейін тапсырулары тиіс.
Конкурс қорытындысында әр құрлық пен аймақтан бір-бір жеңімпаз анықталып, үздік шыққан журналистке елімізді аралау мүмкіндігі беріледі. Олар Air Astana компаниясының ұшағымен Қазақстанға келіп, Алматы және Астана қалаларындағы Rixos қонақүйлеріне тоқтайды. Алатаудың табиғатын тамашалап, Байқоңырға барып, өзге де мәдени-танымдық, туристік бағыттармен жете танысатын болады.
Анар Төлеуханқызы.
Дереккөз: egemen.kz.