Бокстан WBO сериясы бойынша әлем чемпионы Питер Куиллин WBA сериясының жеңімпазы Геннадий Головкинмен жұдырықтасуға дайын. Куиллиннің промоутері Ричард Шефер осылай деді. Бұл туралы Sports.kz порталы хабарлады.
Жасы 30-ға толған, орта салмақтағы Питер Куиллин 20 сәуірде чехиялық боксшы Лукаш Конечныды жеңіп, чемпиондық атағын қорғап қалды. Төрешілердің барлығы бірауыздан Питердің басым түскеніне шек келтірмеді. Куиллин-Конечны жекпе-жегінен кейін америкалық промоутер Ричард Шефер өзінің 31-жеңісіне қол жеткізген Питердің WBA сериясы бойынша әлем чемпионы Геннадий Головкинмен айқасуға дайын екенін жеткізді.
Ричард Шефер: «Егер ұсыныс түссе, біз айқасуға дайынбыз», – деді.
Естеріңізге сала кетейік, қазіргі уақытта Геннадий Головкин мен мексикалық экс-чемпион, кіші Хулио Сезар Чавес арасындағы жекпе-жекті ұйымдастыру мақсатында келісім жұмыстары жүргізілуде. Бұл келісім-шарттың қандай нәтиже беретіні әзірге белгісіз. Головкин мен кіші Чавес арасындағы жекпе-жек болмауы да мүмкін. Өйткені, кіші Хулио Сезар Чавес Top Rank-тан шығып кетуі ықтимал деген сөз бар.
Жолдыбай Базар.
Дереккөз: Sports.kz.
Фото: Sport.nur.kz.