Қазақстан Республикасындағы Адам құқықтары жөніндегі уәкіл Эльвира Әзімова мен Қазақстан халқы Ассамблеясы Төрағасының орынбасары Марат Әзілханов Өзара іс-қимыл және ынтымақтастық жөніндегі меморандумға қол қойды.
Бұл Меморандум ақпараттық бағыттағы өзара іс-қимылды әрі қарай жетілдіру үшін тараптар арасында ынтымақтастық орнатуды көздейді. Сондай-ақ құжатта адам және азамат құқықтарын қорғау саласында тәжірибе алмасу, азаматтық және мәдениетаралық диалогтың тиімді жолдарын әзірлеп, оларды іске асыру жұмыстары да қамтылған.
Сонымен қатар Меморандум екі тараптың еліміздегі адам құқықтарына қатысты жағдайлар мен этносаралық ахуал бойынша ақпарат алмасуына жол ашады. Сол арқылы деректерге мониторинг жүргізу және оларды талдау жұмысы жүргізілмек. Одан бөлек, Ассамблеяға азаматтардан, шетелдіктерден, азаматтығы жоқ адамдардан адам құқықтарының бұзылуы туралы өтініштер келіп түскен жағдайда Адам құқықтары жөніндегі ұлттық орталықты дереу хабардар ету, адам құқықтарын қорғау саласында түрлі іс-шара өткізу сияқты бірлескен іс-қимылдар да қарастырылған.
Меморандумға өзара іс-қимылдың негізгі мәселелерін талқылау нәтижесінде қол қойылғанын атап өткен жөн.