ҚР Бас прокуратурасы азаматтардың қандай жағдайда ата-ана құқығынан айырылатынын түсіндірді, деп хабарлайды Egemen.kz.
Ведомство мәліметінше, оған мынадай жағдайлар себеп болуы мүмкін:
- ата-ана міндетін орындаудан жалтарса, оның ішінде алимент төлеуден қасақана жалтарса;
- дəлелді себепсіз өз баласын перзентханадан, жетім және ата-ана қамқорлығынсыз қалған балаларға арналған ұйымдардан алып кетуден бас тартса;
- өздерінің ата-аналық құқығын теріс пайдаланса (мысалы, баланы оқытуға қасақана кедергі келтірсе, балаларын қайыр сұрауға немесе ұрлыққа баулыса, баланы жезөкшелікпен айналысуға итермелесе, спирттік ішімдік немесе есірткі тұтынуға тартса);
- балаларына қатал қараса, оларға физикалық немесе психикалық зорлық-зомбылық көрсетсе, оны жыныстық қылмысқа итермелесе;
- спирттік ішімдік немесе есірткі құралдарын, психотроптық заттарды жəне соның аналогтарын пайдаланса.
Ата-ана өз баласының, жұбайының немесе отбасының басқа мүшелерінің өміріне немесе денсаулығына қасақана қылмыстық құқық бұзушылық жасаған кезде ата-ана құқығынан айырылады.
«Ата-ана құқығынан айыру сот тəртібінде, прокурордың жəне қорғаншылық немесе қамқоршылық қызметімен айналысатын мекеменің қатысуымен жүргізіледі» деп мәлім етті Бас прокуратурадан.