Мемлекет басшысы Қасым-Жомарт Тоқаев «Париж келісімінің мақсаттарына және Қазақстанның көміртекті бейтараптығына қол жеткізу жолдары» атты халықаралық конференцияда «Көмірсутекті бейтараптыққа жетуде орман алқаптарын көбейту маңызды рөл ойнайды. Қазақстан орман алқабы аз мемлекетке жатады. Орман қорының көлемі 30 млн гектарды немесе аумақтың 11 пайызын құрайды. Биыл елді жасыл желектендіру бойынша ауқымды жоба басталды. 2025 жылға дейін 2 млрд ағаш отырғызылады» деген болатын.
Өңірде орман қорының молаюына айрықша мән беріліп, көшет отырғызу жұмыстары мұқият қолға алынған. Ежелден самсаған ақ қайың, мәңгі жасыл қарағайымен көрікті Көкше өңіріндегі орман-тоғайдың көлемін еселей түсу келер ұрпақтың игілігіне қалдыратын баға жетпес мол мұра іспетті. Кіші Түкті орман шаруашылығы зерлі Зерендінің көркемдігі кемел, пұшпағы құнарлы өңіріне орналасқан. Орман шаруашылығының тұқымбағында өзге өңірлерді көгалдандыруға аса қажетті көшеттер өсірілуде. Күнге бой салып көтеріліп келе жатқан көшеттер 100 гектар жерге отырғызылған.
Ит тұмсығы өтпейтін Кіші Түктінің орман сілемдері тұмса қалпында. Атқан оқтай түзулікпен отырғызылған балапан ағаштардың бой көтеріп келе жатқанын көрудің өзі бір қуаныш. Маңайы арамшөптен таза алқап үстінен ұқыпты қолдың табы анық байқалады. Бір мезгілде отырғызылғандықтан да биіктігі біркелкі.
– Біз баптап өсірген көшет алқабының мына тұсы 50 гектарға таяу, – дейді орманшы Сергей Чернов, – маңдай теріміздің арқасында жақсы көктеп шығып келе жатыр. Бірлігі мығым ұжымның бірегей еңбегі арқылы көктем шығысымен қолайлы уақытты өткізіп алмай, жүктелген жұмысты жауапкершілікпен атқарып шықтық.
Тұқымбақта 15 адам тұрақты жұмыспен қамтылған. Орман дақылдары жөніндегі инженер Людмила Санарованың айтуына қарағанда, ағаш тұқымын жинаудан бастап қайта өңдеуге дейінгі жұмыс орман шаруашылығы мамандарының күшімен атқарылады. Көшетке байланысты қат-қабат шаруаның барлығы ғылыми негізбен, күнделікті тәжірибемен ұштастырылған.
– Көгертіп көшет өсіру жан дүниемізге өте жақын, – дейді жұмысшы Мәрия Қабдуәлиева, – біз өсірген көшеттерден қаулап қалың орман өссе, оның игілігін адамдар көрсе, бір ғанибет емес пе?
Облыста 2025 жылға дейін 200 млн түп көшет отырғызу межеленуде. Ауқымды жұмыс дәл осындай қарқынмен атқарылатын болса, міндет үдесінен шығуға мүмкіндік мол.
Ақмола облысы,
Зеренді ауданы