Әлемнің 160-ракеткасы саналатын қазақстандық Михаил Кукушкин «Уимблдон» турнирінің негізгі кезеңіне жолдама беретін іріктеу сайыстарының финалына жолдама алды.
Кукушкин іріктеу сайыстарының жартылай финалында дүниежүзілік рейтингте 230-орында тұрған 38 жастағы германиялық Филипп Кольшрайбермен күш сынасты. Бірінші партия тай-брейкке дейін созылып, германиялық спортшы жеңіске жетті – 7:6 (7:4). Есесіне екінші сетте қазақстандық теннисші есе қайтарды – 6:3. Ал үшінші, шешуші партияда Кукушкин 2:0 есебімен алға кетті. Есеп 5:2 болып, матчқа доп бергенде, қазақстандық теннисші сол мүмкіндігін пайдалана алмады. Дегенмен кейіннен бәрібір мақсатына жетті – 6:4. Кукушкин іріктеу сайыстарының финалында әлемнің 178-ракеткасы мажарстандық Жомбор Пирошпен кездеседі. Оны жеңсе «Үлкен дулыға» жарысының негізгі кезеңіне жолдама алады.
Ұлыбританияның Истборн қаласындағы ATP 250 турниріне қатысып жатқан Қазақстанның бірінші, әлемнің 39-ракеткасы Александр Бублик ширек финалға шықты. Екінші айналымда ол дүниежүзілік рейтингте 86-орында тұрған аустралиялық Джон Миллманмен шеберлік байқасып, екі сетте 6:4, 6:2 есебімен жеңіске жетті. Александр жартылай финалға шығу үшін әлемнің 14-ракеткасы америкалық Тэйлор Фрицпен кездеседі.