ПАВЛОДАР. 28 сәуір. С.Торайғыров атындағы Павлодар облыстық мемлекеттік университетінің «Университет-ТВ» студенттік-телеарнасы Ресейдің Томь қаласында өткен байқауда жеңімпаз атанды. Бұл туралы университет баспасөз қызметінің дерегіне сілтеме жасаған egemen.kz тілшісі хабарлады.
Ғылыми-танымдық, ағартушылық бағдарламалар мен университет телебағдарламаларының «Университет -ТВ» бүкілресейлік фестиваліне павлодарлықтардан бөлек, В.Шухов атындағы Белгород мемлекеттік технологиялық университеті, Кемеров мемлекеттік университеті, Томь политехникалық университеті, Оңтүстік Орал мемлекеттік университеті, Ф. Достоевский атындағы Омбы университеті, Томь басқару және радиоэлектроника университеті, Новосібір мемлекеттік техникалық университеті, «Саха» ұлттық хабар тарату компаниясы, «Томь» ҚТРК, Саратов мемлекеттік заң академиясы қатысып, өздері дайындаған туындыларын көрсетті.
Ал С.Торайғыров атындағы университеттің телевилениесі байқау үшін арнайы дайындаған хабар «Бағдарламаның ең үздік дизайні» аталымы бойынша жеңімпаз атанды. Студенттік телеарна Ресейде Мәшһүр Жүсіптің өмірі мен шығармашылығына арналған «Халыққа дарыған даналық» атты танымдық деректі фильмін көрсетті. Университет медиа-орталығының режиссері Елена Дьяченко, оқу үрдісін ақпараттандыру бөлімінің жетекшісі Сапар Тоқсанов, инженер бағдарламашы Елена Барановалар жүлделі орын алуға өз үлестерін қосты.
Томь қаласында сондай-ақ «Танымдық теледидар: елдегі зияткерлік потенциалды сақтау және дамыту» атты ғылыми-тәжірибелік семинар да өтті. Ғылыми семинарға РФ Білім және ғылым министрлігі, «Сібір ашық университеті» ассоциациясы, Томь қоғамдық палатасының өкілдері қатысты.
Фарида Бықай.
Дереккөз: egemen.kz.
Фото: www.inform.kz.