Елордада қоғамдық кеңістіктер ашу және аулаларды түбегейлі өзгерту бойынша ауқымды жұмыстар жүргізіліп жатыр, деп хабарлайды Egemen.kz қала әкімдігінің сайтына сілтеме жасап.
Мәселен, Бейбітшілік және келісім сарайы аумағында амфитеатр, қаланың оң жағалауындағы тағы бір жаяу жүргіншілер жолы, 100-ге жуық аула мен қоғамдық кеңістік салынды. Олардың барлығы елорданың визит карталарына – қала тұрғындары мен қонақтары үшін тартымды орындарға айналды.
«Өздеріңіз білетіндей, біз «Нұр-Сұлтан – жайлы қала» мастер-жоспарын қабылдадық. Биыл тағы 200-ден астам қоғамдық кеңістік пен аула құрылады.
Мысалы, оң жағалауда біз алғашқы жаяу жүргінші жолын, орталық саябақты, қала алаңын субұрқақтармен, «Театральный» бульварымен («Жастар» сарайынан музыкалық жас көрермен театрына дейін), жағалауды жалғадық. Бейбітшілік және келісім сарайының жанында амфитеатр ашылды, Бараев көшесінде тағы бір жаяу жүргіншілер жолы абаттандырылды, көше спортының колизейі ашылды, көпір алаңдары абаттандырылды. Олардың барлығы қала тұрғындары үшін де, қала қонақтары үшін де тартымды орындарға айналды», деді Алтай Көлгінов.
Сондай-ақ елордада құтқарушылар, мұғалімдер, медицина қызметкерлерінің құрметіне саябақтар абаттандырылды, Көктал елді мекенінде саябақ ашылды. Қала тұрғындары мен қонақтары қоғамдық кеңістіктер мен аула аумақтарында, атап айтқанда: баскетбол/футбол алаңдарында, workout-аймақтарда, демалысты тыныш орында өткізуге арналған аймақтарда, әткеншектер, шығармашылық өнер көрсетуге арналған көріністер, скейт-аймақтарда демала алады.
Осылайша, елордада құрғап қалған орындар, қараусыз қалған учаскелер мен батпақты жерлер саны айтарлықтай азайды. Олардың орындарында қала тұрғындары мен қонақтары үшін тартымды орындар пайда болды. Абаттандыру жұмыстары бас шаһардың барлық аудандарын қамтыды.