Нөкісте медициналық орталық ашылады

Шавкат Мирзиёев аймақта созылмалы аурулары және мүгедектігі бар 120 балаға арналған балалар медициналық оңалту орталығын, 80 орындық балалар фтизиатрия­лық санаторий, Нөкіс қаласы медицина бірлестігі құрамындағы 20 орындық хирургиялық бөлімше­сін, 20 орындық ауыр науқастарға паллиативтік көмек көрсету бөлімін (хоспис), шалғайдағы ауылдарда 34 қосымша медициналық пункттер құруды тапсырды.

Сонымен қатар 2022 жылдың соңына дейін жергілікті жедел жәр­дем қызметін 63 арнайы көлік­­пен қамтамасыз етілуі керек. 1 қыр­күйектен бастап орталық көп­са­ла­лы және отбасылық емхана­лар­­дың филиалдары негізінде 16 отба­сылық дәрігерлік пункт жұмыс істей бастайды. Қарақалпақстанда бала­лар арасында кең тараған ауру­ларды ерте анықтау мақсатында 2-10 жас аралығындағы балалар арасында гельминтоз, 12-15 жас ара­лығындағы қыздар арасында анемия бойынша скринингтік бағдарлама жүзеге асырылады.

Биылғы 1 шілдеден бастап лепрозорияларда жұмыс істейтін бар­­лық қызметкер лауазымдық жа­лақысына 50 пайыз үстемеақы алады. Аталған қаулыда кадрларды даярлау шаралары да нақтылан­ған. Оған сәйкес кемінде 3 жыл жұмыс өтілі бар отбасылық дәрігерлер жер­гілікті бюджет қаражаты есебі­нен қайта даярлау курстарынан өтеді. Медициналық жоғары оқу орындарының түлектері және меди­циналық мекемелердің мамандары Жедел медициналық көмекті дамыту қоры есебінен жедел жәрдем және жедел медициналық қызмет­те жұмыс істеу үшін қайта даярлау курстарында оқытылады. 2022-2024 жылдары кемінде 75 медицина қыз­меткері біліктілігін арттыру және та­ғылымдамадан өту үшін беделді шетелдік медициналық мекемелер мен орталықтарға жіберіледі.