Таяуда үйінен қашқан 12 жастағы жасөспірімді іздеуге Петропавлдың полициясымен бірге еріктілер, қала маңының тұрғындары тартылған. Көптің көзі қырағы емес пе, ақыры баланы әлеуметтік желіге шыққан белгілерінен таныған тұрғындар полицияға ұстап берген еді.
Алайда бала үйіне қайтарылғанымен екі күннен кейін қайта қашқан. «Арқада қыс жайлы болса арқар ауып несі бар» демекші, үйіндегі жағдайы жайлы болса, бала да үйінен кетпес еді. Ювеналдық полиция бұл жағына аса мән бермеген сияқты. Тек іздестіру шараларына қайта кіріскен.
Қызылжар тұрғындарының аптап ыстықтан паналайтын жалғыз жері – қала маңындағы «Пестрый» көлі. Осы көлдің жағажайында халық қаптап жүреді. Ювеналдық полиция 12 жасар қашқынды осы жағажайды сүзіп жүріп тапқан. Бала тағы да үйіне қайтарылды, бірақ бұл жолы қашанға дейін ата-анасымен бірге тұрары белгісіз...
«Пестрый» көлінің жағажайын сүзіп, үлкендердің бастауынсыз жүрген бала атаулыны қаққан полицейлер басқа да «жоғалған балаларға» тап болды. Еліміздің оңтүстігіндегі Түркістан облысынан солтүстікке «серуендеуге» келген кәмелетке толмаған 4 бала да осы жағажайда рахаттануда екен. Бұларды да ата-аналары жоғалтып, полицияға іздеуге беріпті. «Серуендеуші серілердің» жастары 16-дан аспаған. Бізде жеке басты куәландыратын құжат 16 жастан беріледі ғой, мыналардың жолға билет алу үшін куәліктері болған сияқты. Ал ақшаны қайдан алғаны белгісіз. Ата-анасын алаңдатып, мұндай серуенге шыққандар ақша табудың криминалдық жолын іздейтіндігі де хақ. Демек, талай адамның қалтасына түсіп немесе сәл қараусыз қалған дүниелерін қақшып жүргендері де күмән туғызбас...
«Қазір төртеуі де кәмелетке толмағандарды бейімдеу орталығына жеткізілді, ата-аналарына олардың жүрген жері туралы хабарланды», дейді Петропавл қаласы ПБ ЖПҚ бөлімінің бастығы, полиция майоры Рустам Садулов.
Сонымен бірге жасөспірімдер тарапынан тіркелген қылмыстарға бұлардың қатыстылығы да анықталатын шығар. Бір жоқтың арқасында табылған көп жоқтың болашақ тағдыры туралы ата-аналарына ой саларлық тәрбие жұмыстары да жүргізілуі керек-ақ...
ПЕТРОПАВЛ