Қазақстан Президенті жанындағы Орталық коммуникациялар қызметінде Парад қолбасшысы, Қазақстан Республикасы Қарулы Күштері Құрлық әскерлерінің бас қолбасшысы генерал-лейтенант Мұрат Майкеев пен Құрлық әскерлері бас қолбасшысының орынбасары полковник Жұмабек Хасеновтің қатысуымен брифинг өтті.
Брифингтің тақырыбы 7 мамырда Астанадағы «Қазақ елі» алаңында өтетін әскери парадқа дайындық барысы болды.
М.Майкеевтің мәлімдеуінше, 2014 жылғы парадтың басты ерекшелігі оның технологиялық сипаты болып табылады. Қазақстан армиясының жаңа және заманауи қару-жарағы мен әскери техникасының үлгілерін көрсетуге басымдық берілетін болады.
«Парадта көрсетілетін техниканың бір бөлігі Қазақстанның қорғаныс-өнеркәсіптік кәсіпорындарында жаңғыртылған немесе шығарылған», деп атап өтті М.Майкеев.
Әскери шеруге Қорғаныс, Ішкі істер, Төтенше жағдайлар министрліктерінің, Ұлттық қауіпсіздік комитетінің, Мемлекеттік күзет қызметінің, сондай-ақ, Қорғаныс министрлігінің, ІІМ және ТЖМ-нің әскери техникалары мен авиациясы қатысады.
Әскери шерудің салтанатты маршының жаяу легінде 2000-ға жуық әскери қызметші жүріп өтеді, оның 1500-і Қарулы Күштердің жеке құрамы. Механикаландырылған колоннаға 200-ден астам әскери техника бірлігі тартылады.
Жалпы, Астана аспанында бұл күні майдандық, армиялық және әскери-транспорттық авиацияның ең үздік топтары сап түзейді. «Қазақ елі» алаңы үстінен 7 мамыр күні 70-тен астам қазақстандық Әскери-әуе күштерінің авиациялық техникасы ұшып өтпек.
Шеруге қатысу үшін еліміздің барлық әскери гарнизондары мен әскери бөлімдерінен әскери қызметшілер тартылған, оның ішінде әйел әскери қызметшілер де бар.
«Егемен-ақпарат».