Тіршілік көзін тігіншіліктен тапқан

Әлфия Жүкенова белгілі тележүр­гізуші, жұртшылықты шағын кәсіпке баулып жүрген Динара Сәтжанның курсынан тәлім алып, 2019 жылдан бастап тігін ісін игеруге кіріседі.

Алғашында бір тігін машинасымен іске кіріскен оның қазір түрлі опера­ция жасай алатын 15 іс машинасы бар. Бәрін де үш жылдың ішінде өз ақшасына сатып алған. Алдымен 30 шаршы метрде жалғыз «ЖАК» тігін машинасымен бір өзі тігінмен айналысыпты. Қолы жүретініне көзі жеткен соң өндірісін ұлғайтып 80 шаршы метрлік ғимаратты жалға алады. Алғашында үш адам бірігіп істесе, қазір оның қарамағында 9 қызметкер бар. Алдымен шағын былғары сөмкелер, одан спорттық костюмдер, көйлектер, тіпті автомобильдерге арналған сөмкелер де тігеді. Әмиян секілді былғары сөмкелерді тігу әдісін Ә.Жүкенова Санкт-Петер­бургтегі курстан үйренген. Бір өкі­ніштісі сол, осы өнімді жалғастыру ісі қазір тоқтап қалған, өйткені Ресейден былғары алу қиындап кетіпті.

Әлфия 10 тамызда Ақтау қаласында болатын сән дизайнерлерінің көрмесіне қатысқалы отыр. Оған ұлттық өрнектер салынған  костюм, шапан, көйлек тігіп апармақшы.  

Әлфияның өндірісінің бір артық­шылығы ретінде оның әлеуметтік бизнеспен айналысатынын атауға болады. Оның қарамағында әлеуметтік осал топтардың өкілдері де жұмыс істейді. Екі әйел Ираннан оралған жалғызілікті көпбалалы әйел, тағы бір қыз екінші топтың мүгедегі, қолынан іс келетін зейнеткер әйелдер де мұнда нәпақасын айырып жүр. 

Биыл Ә.Жүкенова жалға алған ғимаратында іс тігу және пішу бойынша орталық ашамын деп жариялаған. Оған 10-15 оқушы қабылданыпты. Ашылу салтанатына облыс әкімінің орынбасары Ғани Сақтағанов пен белгілі бизнесвумен, Әлфияның ұстазы Динара Сәтжан да қатысты. Қазір мұнда тігіншілік пен пішудің қыр-сырын білгісі келетін қолдары бос адамдар түске дейін келіп, ақылы түрде сабақ алады. Ал жұмысқа орналастыру орталығы арқылы тігіншілікке үйренгісі келетін адамдарды қабылдай алмайды. «Өйткені біздің аталған мемлекеттік органмен әзірге келісім-шартымыз жоқ. Егер олар өздері жібе­ретін адамдар үшін ақы төлейтіні туралы келісім жасаса, әрине, біз ондай адамдарды да тігіншілікке үйретеміз», дейді кәсіпкер.  

Қазіргі жалға алған үлкен ғима­рат­тың біраз бөлігіне әлі жылу тартылып үлгермеген, жаңа құрылыс. «Егер осы жерге биыл жылу енгізілсе, өнді­ріс­ті ұлғайтып, 45 адамға дейін жұмыс ор­нын аша аламыз», деп отыр Әлфияның өзі.   

Әрине, біз оның мемлекеттік тап­сырыс бойынша тендерлерге қатысу мүмкіндігін сұрадық. Бірақ бұл жа­ңадан бастаған кәсіпкер­лер үшін оңай емес екен. Алдымен «Атамекен» кәсіпкерлер палатасы­ның батасын алып, сосын Индустрия және инфра­құрылымдық даму министр­лігінен арнайы «индустриалдық сертификат» деген құжат иелену керек екен. Тек осы құжатың болса ғана тен­дерге қатыса аласың. «Оның талабын толық орындау өте қиын. Сондық­тан ондайды мен түгіл бірнеше жыл­дан бері үлкен кәсіпкерлікпен айналысып жүргендер де ала алмай жүр. Сол себепті біз ондай құжат алуға әзірге талпынғанымыз жоқ», дейді Ә.Жү­ке­нова. Кәсіпкердің айтуына қара­ғанда, қазір «Атамекен» палатасы жеңіл өнеркәсіп өнімдерін шығаратын ұсақ кәсіпкерлердің басын біріктіріп ассоциация құрмақ көрінеді. Міне, осы ассоциация болашақта тендерлерге қатысып, құрамындағы кәсіпкерлерге мемлекеттік тапсырыстар алып беруге тырысатын болмақ... 

Әлфияның айтуына қарағанда, қазір кәсіпкер астанадан 50 спорттық костюм тігуге тапсырыс алған. Оның үстіне 20 костюмді қосымша тікпек және оларды тез арада әзірлеуге тиіс. Тапсырыс берушілер бұларды интернеттен, түрлі БАҚ-тардағы жарнама, хабарландырулардан өздері іздеп табады екен.

Әрине, шағын бизнесті дөңгелетіп кету оңай емес. Ол үшін қажырлылық пен белсенділіктен басқа шебер кадрлар табу да керек. Тігіншілік үлкен өнер, неше жерден машина жетілдірілген болса да, қолдың ебі болмаса оны тиімді пайдалану қиын. Ал пішу жұмысы – тігіншіліктегі барлық операцияның ішіндегі күрделісі. Әлфия бұл іске ұзақ жылдар бойы Петропавлдағы бұрынғы «Комсомолка» тігін фабрикасында шебер тігінші болып  істеп, бірнеше орден-медаль алған, артынан бірнеше жыл мектептерге тігіншілік бойынша сабақ берген, зейнет демалысындағы Райхан Сұрағанованы тартыпты. «Апайымыздың өнері де, ісі де бізге үлкен үлгі болып отыр. Біз ол кісіні қатты құрметтейміз», дейді Ә.Жүкенова.

Қазір солтүстіктегі шағын кәсіп­керлердің 42 пайызы – әйелдер, соның бірі – осы Әлфия Жүкенова. «Жеке кәсіпкер» деп қана тіркелген оның кәсіпорнының дами түсетініне сенгің келеді, өйткені ол ешкімге сенбей, ешкімге қол жаймай өз жолын тауып, сенімді қадаммен алға жүріп келеді.

ПЕТРОПАВЛ