«Заманың түлкі болса, тазы боп шал» дегендей, қазір полицейлер де интернет-алаяқтарды құрықтау жолдарын жетілдіріп келеді. Шілденің 26-27-сі күндерінде Anti-fraud жедел-профилактикалық іс-шарасы режімінде жұмыс істеген солтүстікқазақстандық криминалдық полицейлер алты интернет қылмысты анықтады.
Сонымен бірге пин кодын біліп алып жасаған 14 қылмыс ашылды. Оның ішінде біреуі банк карточкасы арқылы ақшасын банкоматтан ұрлап алу болса, қалғаны иелеріне несие ресімдеу жолымен жасалған қылмыстар.
Olx.kz, Krisha.kz, Kolesa.kz сайттарына және ВКонтакте, Instagram әлеуметтік желілеріне мониторинг жасау барысында бірнеше қылмыстың жолы кесілді. Мәселен, бір автомобильді сату туралы үш қаладан фейк хабарландырулар берілген. Алушы табылса, алдын ала төлеген ақшасынан айырылып қалар еді. Осындайлардан зардап шеккендер болса, оларды анықтау жұмыстары жүргізіліп жатыр.
«Бұдан бөлек, Instagram-да спорттық киім сататын жалған дүкеннің аккаунты анықталды», деп толықтыра кетті облыстық ПД Криминалдық полиция басқармасының бастығы, полиция подполковнигі Марат Жұмалиев. – Алаяқтар Петропавлдағы мекенжайды көрсеткен, ал шындығында онда ешқандай сауда орны болмай шықты. Зардап шегуі мүмкін адамдарды анықтау бойынша шаралар қабылданды. Барлығы іс-шараның үш күнінде түрлі құқыққа қайшы контенті бар 60 сілтеме анықталып, Ақпарат және қоғамдық даму министрлігіне тексеру және бұғаттау үшін жіберілді».
ПЕТРОПАВЛ