Жыл басынан бері өңірде жол қозғалысы ережелерін бұзған 134 мың құқық бұзушы әкімшілік жауапкершілікке тартылды. Оның 99 мыңы өрескел құқық бұзушылық санатында. Адам өліміне әкеліп соқтыратын қауіп-қатердің көбеюі де осындай жауапсыздықтан туындауы әбден мүмкін ғой.
Күні кеше ғана Көкшетау – Рузаевка бағытындағы тас жолдың 30-ыншы шақырымында жол-көлік оқиғасы болып, екі адам опат болды, екі адам ауруханаға жеткізілді. Айдың-күннің аманында қаншама қайғы-қасірет?! Осыған дейінгі жол-көлік оқиғаларын сараптап қарасаңыз, шығасыға иесі басшы болатын, оқыс оқиғаға себепкер болып жатқандардың басым көпшілігі жүргізушілердің өздері екен. Полиция қызметкерлері жол қозғалысы ережелерінің өрескел бұзушылықтарын анықтап, шара қолдануда. Жол қозғалысы қауіпсіздігін жақсарту мақсатында облыс аумағында тұрақты түрде жедел алдын алу іс-шаралар жүргізілуде.
Таяуда «Қауіпсіз жол» республикалық айлығы өткізілді. Айлық барысында 15 мыңға жуық жол қауіпсіздігі ережесін бұзған жүргізушілер әкімшілік жауапкершілікке тартылды. Олардың арасында мас күйінде көлік жүргізгендер – 17, көлік жүргізу құқығы жоқ – 290, жүргізу құқығынан айырылған 55 жүргізуші анықталса, қозғалыс жылдамдығын шамадан асырып жіберген 7 110 дерек тіркелген. Міне, осындай жауапсыздықтың салдарынан қара жолдың бойында қаншама қасіретті оқиға орын алып жатыр. Төбе шашыңды тік тұрғызатын апаттар туралы бұқаралық ақпарат құралдарында үзбей жазылып, әлеуметтік желілер арқылы таратылып жатса да, сақтануға салақтығымыз-ай! Қарапайым ғана бір мысал келтіре кетелік. Кейде адам өмірінің аман қалуына әсер ететін қауіпсіздік белдіктерін тағуды ескере бермейміз. Белдік таққан талай жүргізушінің сұрапыл жол-көлік оқиғасында аман қалғанын естіп те, көріп те жүрміз. Айлық барысында қауіпсіздік белдігін пайдалану ережелерін бұзудың 2 606 оқиғасы тіркелген.
Қала көшелерінде көлік жүргізіп бара жатып телефонмен сөйлесетіндердің де қатары селдіремей тұр. Мұны жаяу жүргіншілердің көбі көріп те жүр. Әсіресе жастар жағы осындай келеңсіз көрініске әуес. Айлық барысында көлік жүргізіп келе жатып телефонмен сөйлескен 1 746 жүргізуші анықталып, жол қозғалысы ережелерін бұзғаны үшін 395 көлік айып тұрағына жеткізілді.
Өткен демалыс күндері өткізілген рейд барысында небәрі екі тәулікте 632 жол қауіпсіздігі ережесін бұзу фактілері белгілі болды. Оның ішінде, өкінішке қарай, мас күйінде көлік жүргізген 27 жүргізуші бар. Апат айтып келмейді дегенімізбен, дәл осындай жағдайда бір қауіптің орын алатыны белгілі болып тұр емес пе?!
Жол инфрақұрылымдарын жетілдіру және жол қозғалысының қауіпсіздігін жақсарту мақсатында облыстық әкімшілік полиция басқармасы жол және коммуналдық қызмет өкілдерімен бірлесе отырып, жолдар мен жол құрылыстарына 562 тексеру жүргізді. Балалар мен жасөспірімдер жиі жүретін оқу орындарының маңы басты назарға алынып, қосымша 188 жол белгілері қойылды. Коммуналдық қызмет мекемелеріне жол бойында орын алып отырған кемшіліктерді жоюға 562 ұйғарым берілді. Міне, осылайша, жол бойындағы қауіпсіздікті сақтауға байланысты жұмыс жүргізіліп отыр. Қалай болған күнде де жүргізушілердің өзі абай болғаны жөн.
Ақмола облысы