* Қазақстанда капиталды заңдастыру 1 қыркүйектен басталады. Ол 2015 жылы 31 желтоқсанда аяқталады. Премьер-Министрдің орынбасары – Қаржы министрі Бақыт Сұлтановтың айтуынша, заң жобасында мүлікті жария етудің негізгі қағидалары айқындалған.
* Азық-түлік корпорациясы Солтүстік Қазақстан облысынан астық сатып алуға 3,3 млрд. теңге бөлді. Бұл туралы мәлім еткен облыстық филиал директорының орынбасары Аблан Есентаев оның алдын ала бағасы тоннасына 20 мың теңгеден екенін де айтып отыр. Бүгінге дейін аймақтағы ауыл шаруашылық тауарын өндірушілерден 70 мың тоннаға өтініш түскен.
* Павлодарда «Қазақстанның үздік тауары» көрме-байқауы өтеді. Шілде айына жоспарланып отырған байқау аясында қаланың орталық алаңында ауқымды халықтық жәрмеңке ұйымдастырылады. Шараға қатысатын отандық тауар өндірушілер 3 номинация бойынша сынға түседі.
* Қызылордада жылына 6 мың тонна ет шығаратын құс зауыты салынады. Осыған орай «Байқоңыр» ӘКК мен «Байқоңыр» ҰК бірлескен шағын маркет ашу жобалары қолдау тапты.
* «Бекіре-2014» рейді кезінде Жайық-Каспий бассейнінен 25 тоннадан астам балық алынды. Сәуірдің 1-нен басталған акция құқық бұзушылықтың 725 фактісін анықтады. Әкімшілік жауапкершілікке 551 адам тартылып, 78 қылмыстық іс қозғалды.
«ҚазАқпарат»,
«Қазақстан жаңалықтары», Egemen.kz хабарлары бойынша дайындалды.