Күні кеше жер жәннаты Көкшеге қияндағы Түрікменстаннан жеті отбасы көшіп келді. Салт басты, сабау қамшылы емес, үйелмелі-сүйелмелі бала-шағасы бар отбасылы. Алыстан аңсап жеткен қандастарымызды қала басшылары мен көкшетаулықтар темір жол бекетінде қарсы алып, дос құшағын айқара ашып, қарсы алды.
Барлығы 30 адам екен. Қала әкімінің орынбасары Азамат Ысқақовтың айтуына қарағанда, жергілікті билік барлық жағдайын жасамақ. Құжаттарды рәсімдеу, жұмысқа орналастыру, балаларды мектепке және мектепке дейінгі мекемелерге орнықтыру тарапынан ешқандай қиындық болмауға тиісті.
Облыстық жұмыспен қамту және әлеуметтік бағдарламаларды үйлестіру басқармасы басшысының орынбасары Шолпан Салыққызының айтуына қарағанда, Ақмола облысына Түрікменстаннан барлығы 165 адамнан тұратын 51 отбасын көшіру жоспарланған. Қандастар Ақкөл, Аршалы, Астрахан, Атбасар тәрізді он ауданға және облыс орталығына қоныстанбақ. Алғашқы кезеңде жаңа ортаға тезірек бейімделіп кету үшін жан-жақты қолдау көрсетілмек. Әр отбасы мүшесіне 70 АЕК көлемінде көмек көрсетілу қарастырылған. Бір айта кетерлігі, туған жердің топырағына оралған қандастар мұндай жеңілдіктерге квота алған соң ие бола алады.
Күздің түнгі аспаны да мейірленіп, жып-жылы болып тұр. Зәу биікте тананың көзіндей жарқыраған жұлдыздар да атажұртқа табаны тиген тәмам елдің жанарларына сәулесін түсіріп, шапағатын құйып тұрғандай.
Қандастар да, қарсы алушы тарап та қауқылдасып, бұрыннан таныс-біліс, етене жақын адамдардай қауышып жатыр. «Сапар оң болсын!», «Көш көлікті болсын!» деген ізгі тілектер айтылуда. Қандастар үміт отын ала келгендей. Мәселен, ана тілінің кірпігі ғана қимылдайтын, салт-дәстүріміздің жұқанасы ғана қалған Көкшетауға жаңа леп келіп, көшпен бірге арыдағы әдемі салт-дәстүріміз оралып жатса, көненің күбісі күмпілдеп, кенереміз кеңіп қалмай ма?!
– Сәтін салып бүгін киелі Көкше топырағына жеттік, – дейді қандасымыз Ходжаберген Байболатов. – Қай қиырда жүрсең де ата-баба топырағы жадыңнан шықпайды ғой. Көкіректегі сезімді келістіріп айта алмай қиналып тұрғанымды қараңызшы. Ең бастысы, мына балапандарым атажұрттың ауасын жұтып, оттай ыстық топырағын басатын болды. Одан асқан бақыт бар ма?!
Шынында да солай-ау!
Көкшетау