Тәжікстан Республикасының Президенті Эмомали Рахмонды елорда әуежайында ҚР Премьер-Министрі Әлихан Смайылов қарсы алды, деп хабарлайды Egemen.kz Үкіметтің баспасөз қызметіне сілтеме жасап.
Тәжікстан Президенті Азиядағы өзара іс-қимыл және сенім шаралары жөніндегі VI саммитке, ТМД мемлекет басшылары кеңесінің отырысына және «Орталық Азия – Ресей» саммитіне қатысады. 12-13 қазанда Астанада Азиядағы өзара іс-қимыл және сенім шаралары жөніндегі кеңестің VI саммиті өтеді, оған барлығы 50-ге жуық делегация қатысады.
14 қазанда елордада ТМД мемлекет басшылары кеңесінің отырысы өтеді, оның аясында ұйым қызметінің негізгі мәселелері талқыланады. Отырысқа Әзербайжан, Армения, Беларусь, Қазақстан, Қырғызстан, Ресей, Түрікменстан, Тәжікстан және Өзбекстан басшылары қатысады.
Сонымен қатар 14 қазанда Астанада «Орталық Азия – Ресей» саммиті өтеді. Онда сауда, мәдениет, қауіпсіздік және т.б. салалардағы өңірлік ынтымақтастық мәселелері талқыланады.