Қазақстандық банктердің несие портфелі бір айда 2,3%-ға өсіп, осы жылдың 1 қазанында 22,3 трлн теңгеге жетті. Жылдық өсім 23,3%-ды көрсеткен, деп хабарлайды Egemen.kz.
Bank RBK ай сайынғы өсім бойынша елдегі ең ірі кредитор-банктер арасында көшбасшы болып келеді. Жылдық динамика бойынша банк портфелі бір жарым есеге өскен. Банк кәсiпкерлiк субъектiлерiн де, халықты да несиелейдi, ал жеке тұлғаларға өте үлкен сомаға ұзақ мерзiмдi несиелер ұсынады.
Несие портфелінің ай сайынғы өсімі бойынша екінші орынға ЦентрКредит банкі жайғасқан. Мұнда 8,8% қосымша өсім бар. Бұл шамамен 2 трлн теңгеге жуық қаржы төңірегіндегі көрсеткіш. Банк портфелінің жылдық өсімі 61,9%-ды құрады. Соңғы айлардағы мұндай өсім атауын Eco Center Bank деп өзгерткен ресейлік бұрынғы еншілес ұйым Альфа-банкті өзіне қосып алғаннан кейін байқалды. Естеріңізде болса, биылғы қыркүйекте Eco Center Bank өз қызметін тоқтатқанын жариялаған еді.
Үздік үштікті Еуразиялық банк түйіндейді. Банктің ай сайынғы плюсі 4,3%. Бір жыл ішінде банк портфелі 51,3%-ға өскен. Төлемді ұзақ уақыт кешіктіретін несие өтеушілердің бұл банктегі үлесі 6,6% құрады. Бір жыл бұрын бұл көрсеткіш 8,9 пайыз шегінде тұраұталған.
Қазіргі уақытта нашар үрдісі басым банктердің ондығын бұрынғы ресейлік, кейін «Бәйтерек» ҰБХ тұлғасында мемлекетке өткен Bereke Bank (мәміле биылғы 2 қыркүйекте аяқталды) бастап келеді. Бір айда банк портфелі 4,3%-ға, бір жыл ішінде бірден 45%-ға қысқарған. Банк портфеліндегі NPL 90+ үлесі 8,3%-ға жеткен. Бір ай бұрын бұл деңгей 7,9% және бір жыл бұрын 5,1% болған.
Қазақстандағы 21 екінші деңгейлі банктер арасында ай сайынғы динамика бойынша 15 қаржы институты, ал жылдық мәнде 17 банк табысты жұмыс істеп келеді.