Ұлттық статистика бюросы Қазақстандағы демографиялық ахуалды жариялады, деп хабарлайды Egemen.kz.
2022 жылғы 1 қазандағы жағдай бойынша халық саны 19 691,9 мың адамды құраған, оның ішінде қалалықтар – 12 151,7 мың (61,7%), ауылдықтар – 7 540,2 мың адам (38,3%).
2022 жылдың басымен салыстырғанда халық саны 188,7 мың адамға (1 %-ға) өскен.
2022 жылғы қаңтар-қыркүйекте республика халқының табиғи өсімі 2021 жылмен салыстырғанда (201,2 мың адам) 1,6%-ға кеміп, 198 мың адамды құраған.
АХАТ органдары ұсынған азаматтық хал актілерінінің жазбаларындағы мәліметтерге сәйкес, 2022 жылғы қаңтар-қыркүйек аралығында 299,7 мың сәби дүниеге келген. Алайда алдыңғы жылмен салыстырғанда бұл - 11,5%-ға аз көрсеткіш.
Халықтың көші-қоны бойынша, биыл елімізге тұрғылықты тұруға 10 995 адам келсе, кеткендер саны – 20 341 адамды құраған.
Еліміздегі негізгі көші-қон алмасуы ТМД мемлекеттерімен болды. Деректер бойынша, ТМД елдерінен келгендердің және сол елдерге кеткендердің көшіп-қонушылардың жалпы санынан үлесі тиісінше 84,4% және 84,8% құрайды.