Индонезияның Бали аралында G20 елдері көшбасшыларының жыл сайынғы саммиті ашылды, деп хабарлайды Egemen.kz Еуроодақ кеңесінің сайтына сілтеме жасап.
Саммитте әлем көшбасшылары COVID-19 пандемиясынан туындаған сын-қатерлерді, өзекті жаһандық мәселелерді және инклюзивті өсу үшін экономикадағы күш-жігерді талқылауға ниетті. Екі күнге созылатын саммит Нуса Дуа жартасының шыңында орналасқан Apurva Kempinski Bali курорттық қонақ үйінде болады.
Сессия басталар алдында Индонезия президенті және 2022 жылғы G20 Индонезия төрағалығының басшысы Джоко Видодо сессияға келген қатысушы елдер делегацияларының басшыларымен жеке кездесті. Видодо G20 саммитінің ашылуында бірлікке шақырып, жиналған көшбасшылар әлемнің жаңа қырғи-қабақ соғысқа түсуіне жол бермеуі керек екенін атап өтті. Саммит сессиялары жабық есік жағдайында өтеді.
Саммиттің екінші сессиясы 15 қарашада өтеді. Онда жаһандық денсаулық сақтау архитектурасы қарастырылады. Саммиттің цифрлық трансформацияға арналған үшінші сессиясы 16 қарашада өтеді.
Айта кетейік, G20 құрамына Аргентина, Австралия, Бразилия, Ұлыбритания, Германия, Үндістан, Индонезия, Италия, Канада, Қытай, Мексика, Ресей, Сауд Арабиясы, АҚШ, Түркия, Франция, Оңтүстік Корея, Оңтүстік Африка, Жапония және ЕО кіреді.
Саммитке G20 көшбасшыларынан бөлек, атап айтқанда, ДДҰ басшысы Тедрос Адханом Гебрейюс, ФИФА президенті Джанни Инфантино, Экономикалық ынтымақтастық және даму ұйымының (ЭЫДҰ) Бас хатшысы Маттиас Корманн қатысады.