Таяуда темірбетон өнімдерін өндіретін «SG Beton» зауыты іске қосылды. Зауыт құрылысы 2021 жылы басталған болатын. Инвестиция көлемі – 16 млрд теңге. Осы заманғы ең озық құрал-жабдықтар орнатылған заманауи зауыт биыл қазан айында өз жұмысын бастады.
Волгодоновка ауылының жанында орналасқан «SG Beton» зауыты 15 мың шаршы метр аумақты алып жатыр. Заманауи жабдықтармен толық жабдықталған. Ең бастысы, озық технологияларды мейлінше тиімді пайдаланатын еліміздегі ең ірі кәсіпорынның бірі. Кәсіпорын құрылыс материалдарының бірнеше түрін барынша сапалы етіп шығаруды жоспарлап отыр. Алға қойған міндет межесі оңынан оңғарылса, қолжетімді тұрғын үй бойынша бірқатар мемлекеттік бағдарламаның сәтті іске асуына септігін тигізбек.
Зауытта жол плиталары, әртүрлі өлшемдегі баспалдақтар, панельдік едендер мен іргетас блоктары тәрізді бірнеше түрлі өнім шығарылмақ. Жылына 456 600 шаршы метр құрылыстың іргетасын берік етуге қажетті өткір қадаларды шығару жоспарлануда. Бұл көлемді таразы басына тартсаңыз, зауыт тәулігіне екі шақырым болатын қадаларды шығарады деген сөз. Мұндай өнімдер өңірдегі құрылыс жұмыстары үшін өте қажет. Аталған өнімдер өндірілсе, өңірдегі құрылыс қарқыны бүгінгіден де арта түсетіні даусыз. Ең бастысы, 240 жұмыс орны ашылмақ. Қазір 106 адам жұмысқа орналасқан. Алдағы уақытта зауыт жұмысшыларының кәсіби деңгейін көтеру үшін оқыту көзделіп отыр. Зауыт жұмысшыларының орташа еңбекақысы 300-350 мың теңге шамасында. Олардың алаңсыз жұмыс істеуіне барлық қолайлы жағдай жасалған.
– Жергілікті жерде жұмыс болғаны, жұмысшылардың толымды еңбек алғаны өте жақсы, – дейді дәнекерлеуші оператор Александр Заяц, – зауыттағы барлық жұмыс автоматтандырылған. Қол еңбегі көп қажет етілмейді. Алдағы уақытта жұмысшылардың да барынша білімді болғаны дұрыс. Өйткені енді бізге жаңа құрылғылармен жұмыс істеуге тура келеді.
Темірбетон құрылғыларын өндіру кезінде технологиялық процестің барлық кезеңі дұрыс сақталса, үлкен жүктемеге төтеп бере алады. Өнім өндіру бірнеше кезеңге бөлінген. Барлығы мүлтіксіз жұмыс істеп, өндірілетін өнімнің сапасына әсер етпек. Зауыт заман талабына толық жауап беретін немістің «Макструдер» фирмасының жабдықтарымен қамтамасыз етілген. Толық автоматтандырылған жүйе жұмысшының қателігіне жол бермейді. Жаңа технологияларды қолдану зауыттың жоғары өнімділігін, сондай-ақ шикізат пен суды үнемдеп тұтынуға мүмкіндік береді. Зауыттағы жұмыс екі ауысым бойынша ұйымдастырылып отыр.
Құрылыс материалдарының қымбаттауы еліміздегі салаға кері әсерін тигізгені анық. Ал жергілікті жерде мұндай өнімнің өндірілуі халыққа қолжетімді әрі сапалы тұрғын үй салуға жол ашады. Шын мәнінде темірбетон зауытының іске қосылуы бұл тараптағы Мемлекет басшысының тапсырмаларын ойдағыдай орындауға ықпал етеді. Яғни темірбетон өнімдерінің өндірісі өңірде ғана емес, еліміздегі сұранысты ақтамақ. Оның үстіне құрылыс жұмыстары қарқынды жүргізіліп жатқан елордадағы қажеттілікті жергілікті өніммен өтейді.
– «SG Beton» зауыты «G-PARK» компаниялар тобына кіреді. Дәл қазір 650 мың шаршы метр көпқуысты плиталар мен 457 мың өткір қадалар шығаруға мүмкіндік бар, – дейді серіктестік директоры Амангелді Кәкібаев, – алдағы уақытта өнім көлемін екі есеге арттырамыз. Келесі жылы бетон дайындау зауыты салынбақшы. Міне, сол кезде құрылысқа қажетті қыруар дүниенің сұранысын өтейміз деп межелеп отырмыз.
Құрылыс саласы қарқынды дамыған кезде өзге де салалас көптеген жұмыс алға басатын болады.
Ақмола облысы,
Аршалы ауданы