Парламент Сенатының Төрағасы Мәулен Әшімбаев еліміздегі кезектен тыс Президент сайлауын бақылау үшін Қазақстанға келген ТүркПА байқаушыларымен кездесті, деп хабарлайды Egemen.kz Сенаттың баспасөз қызметіне сілтеме жасап.
Сөз басында Мәулен Әшімбаев 13 қарашада Ыстанбұлда болған лаңкестік әрекеттің салдарынан адамдардың қаза болуына байланысты Түрік парламентшілеріне көңіл айтты. Сондай-ақ зардап шеккендердің тезірек сауығып кетуіне тілектестігін жеткізді.
Кездесу барысында Сенат Спикері ТүркПА өкілдеріне еліміздегі Президент сайлауына мониторинг жүргізуге қатысып жатқаны үшін алғысын білдіріп, Қазақстан байқау процесіне үлкен мән беріп отырғанын айтты.
Палата Төрағасы сайлауды Қазақстан Республикасының заңнамасына және осы саладағы халықаралық стандарттарға толық сәйкес өткізу үшін барлық қажетті шара қабылданғанын да тілге тиек етті.
Одан бөлек, Мәулен Әшімбаев алдағы сайлаудың маңыздылығына назар аударып, саяси жүйені одан әрі дамыту, билікті монополиялауға жол беретін тәуекелдерді жою және демократияның негізгі қағидаттарын нығайту бағытында жүргізіліп жатқан реформаларға тоқталды.
Сенат Төрағасы атап өткендей, Қазақстанда адам құқықтарын қорғау жүйесін нығайтуға, билік тармақтары арасындағы, сондай-ақ орталық пен өңірлер арасындағы өкілеттіктер мен жауапкершіліктің теңгерімін қамтамасыз етуге арналған бірқатар маңызды конституциялық заң қабылданды.
«Мемлекет басшысының тапсырмасы бойынша Мәжіліс пен мәслихаттарды қалыптастырудың аралас моделіне арналған және аудандық, облыстық маңызы бар қалалар әкімдерін сайлауды кезең-кезеңімен енгізу үшін заңнамалық база құрылды. Осы және басқа да өзгерістер біздің азаматтарымыздың сұраныстары мен мүдделеріне сай келеді. Сондай-ақ мұндай қадам жаңа саяси модельді қалыптастыруға, адамдардың мемлекеттік және саяси институттарға деген сенімін нығайтуға ықпал етеді», деді Мәулен Әшімбаев.
Өз кезегінде делегация басшысы Эрол Кая ТүркПА байқаушылар миссиясының қызметі сайлау науқанын объективті бағалауға бағытталғанын айтты. Сондай-ақ ол Президенттің кезектен тыс сайлауы ел заңнамасына және жалпыға бірдей танылған халықаралық стандарттарға сәйкес өтуіне тілектестігін білдірді.
Айта кетейік, Қазақстандағы президент сайлауын бақылау үшін 35 шет мемлекеттен 10 халықаралық ұйым және 641 байқаушы аккредиттелген. Байқаушылардың миссияларына жәрдемдесу үшін сыртқы істер министрлігінде арнайы штаб құрылды.