Қазақтың қазынасын көргенде талай жұрттың ауызының суы құриды. Менделеев таблицасындағы элементтердің бәрі табылатын жерасты байлығы ұшан-теңіз. Бірақ біз оны айтып отырған жоқпыз. Ол байлықтан да зор қазына бар, ағайын. Жақында сол құндылықты әркімнің өзі барып тамашалауына мүмкіндік туғызылып отыр.
Астана қонақтары мен елордалық тұрғындарға «Астана Опера» мемлекеттік опера және балет театры маусым айында ерекше бір бағалы сый әзірлеп отыр. Театр мұражайы қорынан «Сахна шежіресі» атты көрмеге керемет бұйымдар қойылмақ. Соншама елең еткізетіндей бұл қандай шара?
Мысалы, аты аңызға айналған дәстүрлі әнші Ғарифолла Құрманғалиевтің есімін естігеніміз болмаса, өзін көрген емеспіз. Сол сияқты, күні кеше дүниеден озған Роза Бағланова, Ермек Серкебаев, Әзірбайжан Мәмбетов, Еркеғали Рахмадиев, Роза Жаманова Мыңжасар Маңғытаев, Дәурен Әбіров сияқты әрқайсысы бір-бір тау тұлғалар туралы кейінгі жас ұрпақ өте көп нәрсе білгісі келеді. Бұл тізім ары қарай Сара Көшербаева, Бақыт Әшімова, Василий Яковенко, Сұлтан Байсұлтанов, Бибігүл Төлегенова, Нариман Қаражігітов, Әлібек Дінішев, Қорлан Қалиламбекова, Рахима Жұбатұрова, Нұржамал Үсенбаева, Гүлжан Тұтқыбаева, Майра Мұхамедқызы, Жәмила Баспақова болып жалғасып кете барады. Әлгі көрмеге аты аталып отырған әртістердің киген тарихи театрлық костюмдері мен түрлі фотолары, мұражай дүниелері қойылмақ. Әлемдік деңгейдегі театрлар тәжірибесінде жиі кездесетін мұндай жоба бұдан былай отандық театрдың да дәстүрлі өнегесіне айналып, өткенге, тарихқа деген үлкен құрмет пен ізетті қалыптастырмақ.
«Астана Опера» мұражайының меңгерушісі Априза Құсайынованың айтуынша, бұл үшін көп тер төгуге тура келген әрі мұншама мол қазынаны жинаудың өзі оңайға түспеген. «Костюмдер, тұрмыстық бұйымдар, жұмыс құралдары әртістердің өмірі мен өнерінен сыр шертіп қана қоймайды, сонымен қатар олар туралы жан-жақты мағлұмат алуға болатын естелікке, шежіре-жәдігерге толы. Бұл заттардың әрқайсысынан өткен күндер белгісін сезіну қиын емес. Бүгінде Қазақстанның түкпір-түкпірінен опера мен балетке байланысты барлық тарихи экспонаттар жиналуда. Оған қаншама адамдар қамтылуда. «Театр қоры үшін костюмдерді, мұражай құжаттарын, фотоматериалдарды жинастыруды биылғы жылдың ақпанында қолға алдық. Абай атындағы опера және балет театры мұндағы әріптестеріне Қазақстанның опера және балетінің белгілі тұлғалары бейнеленген 11 картинаны және аса көрнекті әртістеріміздің сахнада киген костюмдерін құрметпен сыйға тартты. Біз тек жекелеген солистердің дүниесін ғана емес, жалпы осы саланың қалыптасуына атсалысқан қайраткерлер жайында қызықты мағлұматтардың бірін қалдырмай жинауды мақсат етіп отырмыз. Бүгінде қорымызда 21 театрлық костюм мен мыңнан астам фотомұражай құндылықтары сақтаулы. Алда күтіп тұрған жұмыстар әлі де шашетектен», – дейді мұражай меңгерушісі.
Көрмеге келушілер үшін «Астана Опера» сахнасында Қазақстанның халық әртістері мен басқа да танымал опера және балет жұлдыздары өнерінен тамаша тартулар әзірленуі өскелең ұрпаққа тағылымды мұра болып қалары сөзсіз.
Жетіқара ҚОҢЫР.
АСТАНА.
Суретті түсірген
Ерлан Омаров.