Қазақстан Республикасы Сыртқы істер министрінің орынбасары Ержан Ашықбаев Куба Республикасында сапармен болды.
Сапар барысында қазақстандық дипломат Кубаның Сыртқы істер министрі Бруно Родригеспен кездесіп, Қазақстан Президенті Нұрсұлтан Назарбаевтың Куба Мемлекеттік кеңесі мен Министрлер кеңесінің төрағасы Рауль Кастроға жолдау хатын тапсырды. Кездесу барысында Е.Ашықбаев, сонымен қатар, Қазақстан Сыртқы істер министрі Ерлан Ыдырысовтың атынан Куба сыртқы саясат ведомствосының басшысын Астанаға ресми сапармен келуге шақырды. Кубалық тарап бұл шақыруды ризашылықпен қабыл алды.
Қазақстандық делегация Куба Сыртқы істер министрінің орынбасары Рохелио Сиерра басқарған кубалық делегациямен ведомствоаралық консультациялар өткізді. Екіжақты форматтағы, сондай-ақ, БҰҰ және басқа да халықаралық ұйымдар шеңберіндегі ынтымақтастық мәселелерінің кең ауқымы талқыланды. Тараптар саяси үнқатысудың күшеюі мен екіжақты құқықтық негіздің дәйекті түрде кеңеюін қанағат сезіммен атап өтті.
Қазақстан делегациясының кубалық жетекші биофармацевтикалық және химиялық өнімдерді шығаратын кәсіпорын – «Лабиофам» мен Гендік инженерия және биотехнологиялар орталығына сапарлары нәтижесінде денсаулық сақтау саласындағы ынтымақтастық перспективалары белгіленді.
Е.Ашықбаев пен Р.Сиерра екі ел арасындағы визалық тәртіпті одан әрі жеңілдетуді қолдайтындарын атап өтті. Бұл екі елдің іскерлік байланыстарының кеңеюіне және туристік алмасудың артуына жол ашатын болады.
Сондай-ақ, қазақстандық дипломат Куба Сыртқы сауда және шетел инвестициялары министрінің орынбасары Илиана Нуньеспен, Куба коммунистік партиясы Орталық Комитетінің сыртқы істер департаменті басшысының орынбасары Оскар Мартинеспен және Куба Халық билігі ұлттық ассамблеясы төрағасының орынбасары Ана Мария Мачадомен кездесті. Тараптар түрлі салалардағы ынтымақтастықты жандандыруды қолдайтындарын атап өтті.
ҚР СІМ басшысының орынбасары Кубаның ұлттық қаһарманы Хосе Марти ескерткішіне гүл шоғын қойып, кубалық БАҚ-қа эксклюзивті сұхбат берді.
«Егемен-ақпарат».