Қазіргі эпидемиологиялық маусымда тұмауратқандар санының өсімі өткен маусыммен салыстырғанда 1,5 есе артық делінген. Соның ішінде 14 жасқа дейінгі балалардың үлесі 65 пайыз болған. Биылғы алғашқы науқас 14 қазанда тіркелген.
Ал жуырда облыстық санитарлық-эпидемиологиялық департамент басшысының орынбасары Арман Көшбасов былтырғы сәйкес мерзіммен салыстырғанда науқастанғандардың биылғы өсімі 1,6 есе деп жариялады. Соның ішінде 260 адам эпидемиялық маусым басталған кезден тіркелген. Олардың арасында 49-ы – жүкті әйел, 83-і – 14 жасқа дейінгі балалар.
Науқастардың ең көп шоғырланған жері – Петропавл қаласы. Барлық науқастың 139 осында тіркелген. Аудандар арасында Қызылжар мен Шал ақынның әрқайсысында 20-дан науқас табылып отыр. Барлық тұмауратқан 262 адамның 245-і тұмаудың В, ал 17-сі А түрімен науқастанған. А.Көшбасовтың айтуынша, науқастанғандардың бәрі де тұмауға қарсы екпе алмағандар.
«Қазір науқастанғандар саны өсе түсуде. Халықтың өз денсаулығына көңіл бөлмейтіні бізді алаңдатады. Егер екпе алғандар көп болса, науқастың саны да азаяр еді. Облыста барлық екпе алған тұрғын саны – 75 мыңдай, бұл – барлық тұрғынның 14 пайызы ғана, олардың арасынан бірде-бірі ауырған жоқ», дейді маман.
Бір қызығы жаман індет меңдеп тұрған 2021 жылдың дәл осы мерзімінде тұмауратқандар саны 40 адам ғана болған. Ал 2020 жылы тіпті бірде-бір адам тұмауратып ауырмаған екен.
Маманның айтуына қарағанда, халық тұмаудан сақтану үшін масканы дұрыс қолдануға, көпшілік жерде әлеуметтік арақашықтықты сақтауға, жеке гигиенаны ұмытпауға шақырады.
Биылғы жаман індетке ұшырағандар саны да өткен жылдың сәйкес мерзімімен салыстырғанда өсіп отыр. Әзірге 50-ден артық адам тіркелген. Халқымыз «сақтансаң сау боларсың» дейді ғой, сақтанудың еш артықтығы болмайды.
Солтүстік Қазақстан облысы