Антыңа адал бол, сарбаз!

Әскери ант – жас сарбаздың өміріндегі аса жауапты сәттің бірі. Ұлттық ұланның «Батыс» тобына қарайтын 5517 әскери бөліміне келіп түскен сарбаздар бір ай бойы оқу пункітінде шынығып, әскери өмірдің қыр-сырымен танысып, саптық дайындықтан өткен. Кең байтақ Отанымыздың әр шетінен – Алматы, Ақтөбе, Маңғыстау, Атырау, Ақмола облыстарынан жиналған жауынгерлер мұнда бір үйдің баласындай болып кетті. Өйткені олардың мақсаты бір – елдің қауіпсіздігі мен аумақтық тұтастығын қорғау үшін мінсіз қызмет ету. Салтанатты ант беру рәсімінен кейін жас буын бірден ер жетіп, есейіп кеткендей.

Әскери бөлімнің Жауынгерлік Туы алаңға шығарылған соң сарбаздар сап түзеп келіп, әскери ант қабылдауға кірісіп те кетті. Сал­танатты жиынға құқық қор­ғау органдарының лауазымды тұлға­лары, Ұлттық ұлан ардагерлері қатысып, ант қабылдаған жауын­герлерді ерекше жауапты сәтімен құттықтады.

– Елімізді, Отанымызды қорғау – әрбір азаматтың ең қасиетті борышы. Өзінің туып өскен елін, жерін қорғап, нағыз сарбаз болу оңай емес. Ол үшін әр сарбаз өзіне қойылған жауынгерлік тапсырманы орындауға жан-жақты дайын болу керек. Ал әскери ант қабылдау дегеніміз – Отанына, халқына жә­не заңды түрде сайланған Пре­зидентіне ақтық демі қалғанша адал қыз­мет ету деген сөз. Бүгіннен бас­тап сіздерге жауапкершілігі мол маңыз­ды міндеттер жүктелгелі тұр. Мен осы бөлімнің командирі ретінде сіздерге жүктелген жауын­герлік тапсырмаларды адал да абы­роймен атқаратындарыңызға толық­тай сенемін, – деді 5517 әскери бөлім командирі, подполковник Сағындық Алқайдаров.

Іс-шараға жас сарбаздардың ата-аналары да арнайы келген. Қа­тардағы жауынгер Талғар Нұрқаб­деннің әкесі Айтжан Нұрқабден сөз алып, жауынгерлерге «Қабылдаған әскери анттарыңызға берік болып, қызметтеріңізді абыроймен атқарыңыздар. Ата-аналарыңыз бен бауырларыңыздың ортасына аман-есен келулеріңізге тілектеспін», деген тілегін айтты.

Батыс Қазақстан облысы