Кәсіпкерлікті қолдау қай деңгейде?

Кәсіпкерлердің айтуы­на қара­ғанда, жылу ақысы бұ­рын­­ғы­дан екі есеге жуық негіз­сіз қым­баттап кет­кен. Олар тариф­тің өзгер­ме­генін және жы­лыту алаң­да­рының сол қал­пы­нда еке­нін, ендеше ақының неге бұ­лай көбейіп кеткеніне на­ра­зы­лықтарын айтты. Кәсіп­кер­лер палатасының сарапшысы Шыңғыс Жылқыбаев та кәсіпкерлердің талабы орынды екенін білдірді. «Біздің ойы­мызша, монополист компания нысанның 1 шаршы метріне тиесілі коэффициентті дұрыс қол­­данбай, ақыны негізсіз көтер­ген», дейді ол.

Кәсіпкер Елена Игнатенконың айтуынша, кеңсе үшін жалға алған нысанының көлемі үнемі 84 шаршы метр болған, ал жылу ақысын есептегенде биыл оны 198 шаршы метрге бір-ақ көтер­ген.

«Мен өзім заңгермін. Біз тек тұтынған жылу үшін ғана ақша төлеуіміз керек. Барлық келісім құжат­тарында осылай жазыл­ған. Менің кеңсемде еш­қан­­дай өзгеріс болған жоқ. Қосым­ша, жылу батареяларын қосқан жоқпын. Барлық төлем парақ­тарын сақтап жүремін. Былтыр желтоқсан айында 7 гига­калорияға ақша төледім. Ал 2021 жылы 3 гигакалорияға төле­дім. Тарифте еш өзгеріс болмаса, хабарламадағы жылу құны неге өсіп отыр?», дейді ол.

Жиналғандардың айтуынша, бұл істі «Секазэнергосбыт» ЖШС өздеріне қосымша табыс табу мақсатында негізсіз жасап отыр. Кездесуге шақы­рыл­ған серіктестік директоры Мағауия Сағындықов бұл пікір­мен келіспейді. Өздеріндегі жаңа өзгерістерге сай монополист ком­пания үйлердің астыңғы қа­ба­тында орналасқан кәсіп­кер­­лік нысандарына берілетін жылу­дың ақысын енді тұтынған жылу­дың мөлшеріне емес, алаң­ның көлеміне баса назар аудару ар­қы­лы есептейтін болып­ты. Кә­сіп­керлер болса бұл жаңа­шыл­дық­тан бейхабар болып шықты.

«Жаңа өзгеріс 2019 жылы қабылданды. Ал біз оны норма­тив­тік құқықтық актіге сай тек өткен жылдың сәуір айынан бас­тап іс жүзінде қолдана баста­дық. Бізден келіп сұраған кәсіп­кер­лерге осыны түсіндірер едік. Алайда ешкім сұрақпен келген жоқ. Кәсіптік нысандарға кәдімгі үйлерге қарағанда жылу көбірек беріледі. Біз министрлік бекіткен «Тарифтерді қалыптастыру қағи­да­ларын бекіту туралы» №90 бұйрығына сәйкес жұмыс істей­міз. Бұл еліміздің барлық өңіріне қатысты», деді М.Сағындықов.

Алайда «Атамекен» кәсіп­кер­лер палатасы сарап­шы­ла­ры­ның сөзіне қарағанда, кәсіп­­керлердің наразылығын тудыр­­ған есептеудің бұл түрі бас­қа өңір­лерде қолданылмайды екен. Сондықтан олардың наразы­лы­ғын тудырған бұл мәселе әлі бір шешімін тапқан жоқ. Түйткіл сот алдында шешілгенше тарқай қоймайтын секілді.

Жалпы, облыстың Кәсіп­кер­лер палатасына өткен жылы бизнесті қорғау бойынша 105 өтініш түсіп, оның 36%-ы оң шешімін тауыпты. Ақшаға шақсақ 2020-2022 жылдар аралығында кәсіпкерлердің құқықтары 804 млн-нан аса теңгеге қорғалған. Түскен өтініштердің ішінде қар­жы­ландыру проблемалары – 20%, жер бөлу – 16%, салық қатынастары бойынша – 15% және мемлекеттік сатып алу сала­сындағы өзекті мәселелер 12% үлес алып, кәсіпкерлерді алаң­дат­қан.

Облыста кәсіпкерлердің құқықтарын қорғау жөніндегі кеңес белсенді жұмыс істеп жатыр. Оның жұмысының нә­ти­ж­­елері бойынша 2022 жылы 7 лауазымды тұлға тәртіптік жа­уап­­кершілікке тартылды. Рес­пуб­­ликалық деңгейдегі 9 ке­дергі, жергілікті деңгейдегі 9 кедер­гі қаралып, соның ішінде барлы­ғы 6 мәселе шешілді.

Кәсіпкерлікті дамытудың 2021-2025 жылдарға арналған Ұлт­тық жобасы шеңберінде Пет­ропавл қаласы мен аудан орта­лықтарындағы филиал­дар­дың қасынан Кәсіпкерлерге қызмет көрсетудің 14 орталығы ашылған. Облыстық Кәсіпкерлер палатасының төрағасы Тимур Бекеевтің айтуына қарағанда бұл орталықтар 2022 жылы жаңа бастаған кәсіпкерлерге 8 907 кеңес берген. Сондай-ақ айрықша клиенттерге 490 қолдау білдіріліпті. Белгіленген меже 472 екен, жоспар 104 пайызға орындалған.

«Іскерлік байланыстар» жобасы бойынша Солтүстік Қазақстан облысынан 5 онлайн тапсырыс берілген. Осындай жобаларды іске асыру барысында 2,5 млрд теңгенің 152 жобасы іске асырылып, 412 жаңа жұмыс орындары ашылған.

Облыстағы «Атамекен-Қы­зыл­­жар» микроқаржылық ұйымы 2022 жылы 197 өтінімді мақұл­дап, 1 млрд 132 млн теңгенің қаражатын бөлген. Оның 80 па­йы­зы инвестициялық жобаларды қолдауға бағытталған. Атап айтқанда, олар техника мен жүк және жолаушы тасымалдайтын автокөліктер сатып алуға, ҚКС, медициналық кабинеттер, кафе, дүкендерге жабдықтар алуға, құ­рылыс материалдарын өнді­ру­ге, мал шаруашылығы мен құс өсіруді дамытуға жұмсалған.

Кәсіпкерлер палатасының айналысатын тағы бір үлкен саласы – адам капиталын арттыру, жұмысқа тұру проблемаларын шешуге көмектесу. Бұл істе айтарлықтай нәти­же­ге қол жеткізді деп айту қиын. Облыстың өндіріс ошақ­та­рында жұмыс қолы әлі де жетіс­пейді. Мәселен, тек былтыр­ғы сауалдамаға қарағанда жұмыс берушілер өздеріне 2 481 маман­ның жетіспейтінін айтқан. Осыны жою жолында Кәсіпкерлер палатасы үлкен нәтижеге қол жет­кізбесе де өздерінің үлесін қосу­ға тырысып келеді. Дуалды оқыту­дың жол картасы бойынша 274 кәсіпорын мен 21 колледж 1 214 үшжақты (кәсіпорын-колледж-студент) келісімшартқа отырғызылды.

Оқу орталықтарының тіркелі­мі­не 19 мекеме қарайды, соның ішінде 8-і кәсіпорындарда ашылды. Олар 93 түрлі жұмысшы мамандар дайындай алады. Бүгінге дейін оларда 325 тыңдаушы өтті. Палата өңірдің ерекшелігін ескере отырып, агроқұрылым сала­сы­ның мамандарын дайындауға ерекше көңіл бөліп отыр. Былтыр агроқұрылымдарда 42 онлайн семинарлар өткізіліп, оған 375 адам қатысты. Бүгінге дейін об­лыстың 8 сүт-тауарлы ферма­ла­ры, 5 құс фабрикасы, 2 ет өңдеу кәсіпорындары арнаулы комис­сия­ның оң қорытындысын алған. Бұл оларға мемлекет тарапынан субсидия алуда қолдау болады.

Солтүстік Қазақстан облысы