Ғалым, философия ғылымдарының докторы, профессор, ҚР ҰҒА академигі Әбдімәлік Нысанбаев 86 жасында қайтыс болды. Қайғылы хабарды «Ғылым ордасы» РМК растады, деп хабарлайды Egemen.kz.
Әбдімәлік Нысанбаев 570-тен астам ғылыми, ғылыми-сараптамалық, ғылыми-әдістемелік еңбектер, соның ішінде 30 монография, жеке кітаптар мен оқу құралдарын жазған. Академиктің бірнеше еңбегі 25 тілде жарық көрген.
Әбдімәлік Нысанбаевтың негізгі зерттеу еңбектері диалектика және таным теориясы, ғылым философиясы мен методологиясы, қазақ және түркі философиясы, әлеуметтік және саяси философия, саясаттану және мәдениеттану мәселелеріне негізделгенін атап өту керек.
Ол Қазақстанда ғылыми мектеп қалыптастырып, ғылым докторлары мен кандидаттарын дайындаған.
Академик ғылым саласындағы еңбегі үшін Қазақстанның (1984) және Түркияның (1999) Мемлекеттік сыйлықтарын, ҚР Президентінің Бейбітшілік пен рухани татулық сыйлығын алған (1998), «Отан», «Парасат» (2004) ордендері (1998) мен бірнеше медальдармен марапатталған.