Орал қаласындағы «Алтын орда» мәдениет үйінде «Алаш» этно-фольклорлық ансамблінің алғашқы концерті өтті. Көне заман аспаптарымен жаңа дәуірдің дүбірін тыңдатқан өнер ұжымының «Еліме арнау» атты ерекше бағдарламасын көрермен өте жылы қабылдады.
Оралдық жас сазгер, болашағы зор өнерпаз Данияр Таңатаров басқаратын «Алаш» этно-фольклорлық ансамблі 2019 жылы құрылған. 2020 жылы наурыз айында алғашқы концертін беру үшін дайындалып жатқанда аяқ астынан пандемия басталып кетті. Көпшілік шара өткізуге тыйым салынды. Сөйтіп жас ұжым екі жылдай ел алдына шыға алмай қалды.
– Бұл әлі қалыптаса қоймаған жас ұжымға оңай болған жоқ. Ансамбль мүшелерінің дені жастар, студенттер болатын. Екі жыл ішінде оқуын бітіріп, өмір ағынымен әр тарапқа кеткені бар. Сөйтіп, осы концертке «Алаш» ансамблі жаңғырып, жасарып келді. Репертуары да байып, кеңейе түсті, – дейді Орал қалалық мәдениет және тілдерді дамыту бөлімінің басшысы Серік Қайырлиев.
Шынында да екі жылдық еріксіз шектеу «Алаш» тобына жақсылық та әкелген: ансамбль мүшелеріне жаңа киім тігіліп, музыкалық аспаптармен қамтылған. Көк бөрі терісімен әдіптелген әдемі ұлттық костюмдер белгілі шебер, «МЕКО» дизайн-студиясының директоры Меңдібек Нұрғалиевтің қолынан шығыпты. Сөйтіп, сыртқы сәні мен ішкі мазмұны келіскен әдемі өнер ұжымы сахнаға шыққан.
Ішкі мазмұн демекші, «Алаш» этно-фольклорлық ансамблі деп аты айтып тұрғандай, ұжым жетекшісі Данияр Таңатарұлы әу бастан репертуарды керемет таңдаған. Ансамбль мүшелерінің орындауында Қаршыға Ахмедияровтың «Алтын ұя» күйі, Жасарал Еңсеповтің ДЭККО стиліндегі «Әке толғауы» шығармасы, бауырлас ноғай халқының жыршысы Арсланбек Сұлтанғалиевтің «Домбыра», «Алаш ұраны» туындылары, «Молдабайдың әні» ерекше шықты. Әншілер Альбина Наурызәлиева, Ернар Өмірәлі, Әділ Жәлетденов құлақ құрышын қандырды.
Дегенмен, концерттің басты жаңалығы – Данияр Таңатаровтың өзі шығарған аспаптық туындылар болды. Алтын Орда хандығының 750 жылдығына арнап жазылған «Алтын Орда» күйі, «Жаңа Қазақстан», «Сазсырнай», «Еліме арнау», «Азат», «Қандағы қасиет» шығармалары ерекше екпінімен, тың сарынымен есте қалды. Бір ерекшелігі, концертті топ жетекшісі Даниярдың өзі жүргізіп, әр шығарманың мән-мазмұнын ашып отырды.
«Сазсырнай аспабы – бала образын, оның сүйкімді қылығы мен қуаныш күлкісін тап басып сомдайтын бірден бір аспап. Алайда осы шығармада сазсырнай жеткізетін бір мұң да бар. Бұл туындымды мен «Бала бақыты» деп атадым. Біз жетімін жылатпаған, жесірін қаңғыртпаған елміз. Тоқсан ауыз сөздің тобықтай түйіні – сәбидің бәрі бақытты болуы үшін жаралған!» – деді Данияр кезекті шығармасын таныстырған кезде. Сөйтіп, сазсырнайға арналған шығармасын ансамбльдің сүйемелдеуімен өзі орындап берді.
Концертте әлемдік музыка әлемінің жанкүйерлері де сый-сияпатсыз қалмады. Белгілі Beltaine тобының репертуарынан «Bring to the boil» шығармасы, әлемге әйгілі Нирвана тобының «Smells like teen Spirit» әні инструменталды нұсқада ұсынылды. «Өнерде шекара жоқ» деген осы ғой.
– «Алаш» этно-фольклорлық ансамблінің осы репертуарын Батыс Қазақстан облысының бүкіл ауданына гастрольдік сапар жоспарлап, халыққа ұсынғымыз келеді. Ал болашақта қазақ өнерінің өрелі бір биігі ретінде кез келген шетелдік сахнаға да шығудан бас тартпаймыз, – дейді Данияр Таңатаров.
Батыс Қазақстан облысы