Брендтік жобалар басымдыққа ие

2020-2022 жылдар аралығында жалпы сомасы 8 млрд 526 млн теңгеге баға­ланған 71 жоба іске асырылса, 2022 жылы 18 жоба іске асырылып, оған 6 млрд 363 млн теңге жұмсалды. Мәдени жобалар облыс орталығында ғана емес, ауылдық елді мекендерде де жүзеге асырылуда. 2022 жылы іске асырылған барлық жобаның 15-і ауылдарда болды. Сонымен қатар мәде­ниет үйлері жанында бюджет және демеу­шілік қаражат есебінен құрылған 69 мәдени-сауықтыру орталығы табысты жұ­мыс істеп жатыр. Олар мәдениеті мен тари­хы бай өңірлерде іске асырылып, туризм­ді дамытуға жаңа серпін беріп отыр.

Өңірде мәдени сала мамандарының тапшылығы білінеді. Облыс әкімі­нің гранттары орындаушылық өнер, теат­р, режиссура, арт-менедж­мент, мә­дени-демалыс жұмысы мамандық­тарына елі­міздің ЖОО-ларына бөлі­не­тін болды. Осы әдіспен жалпы сала бо­йынша 100-ге жуық маманды, шы­ғармашылық адамдарын және тех­никалық қызметкерлерді даярлау жос­парлануда.

Былтыр облыста кейінгі үш жылда алғаш рет жаңа форматтағы халықаралық фестивальдар өткізілді. Соның ішінде «Ботай – Ұлы дала мәдениеті» І халық­аралық суретшілер симпозиумын атап өтуге болады. Оған Қырғызстан, Өз­бек­стан, Ресей және өз еліміздің дарын­ды кескіндеме өкілдері қатысты. Әлемге әйгілі скрипкашы Айман Мұса­қо­жае­ваның қатысуымен «Qyzyljar Music fest» музыкалық фестивалі өтіп, оған Италия, Германия, Башқұртстан ел­де­рінің атақты әртістері, «Астана-Опе­ра» театрының орындаушылары қа­тысты. «Тәуелсіздік – бабалар аманаты» атты халықаралық ақындар айтысы өтті. Со­нымен қатар бас провайдер ретінде жер­гілікті дарындарды, облыстың мә­дени саладағы игіліктерін көрсетуге ар­нал­ған «Жаһандық әлемдегі заманауи қазақстандық мәдениет» жобасы іске асы­рылды.

«Былтырғы қол жеткізген табыс­тар­­­дың қатарында Ольга Ростовщи­ко­­­­ваның жетекшілігімен құлағы кеміс өнер­­паздардан ұйымдастырылған «Sen­sitive» бал биі ансамблінің АҚШ-тағы «25-ші орындаушылық өнер түрлері» фестивалінде Гран-при жеңіп алғанын және Мысыр елінің Хургада қаласында болған әлем чемпионатында бас жүлде алғанын айтуға болады. Ал «Әдемі-ау» би ансамблі Түркияның Измир қала­сында өткен IV Дүниежүзілік көшпен­ділер ойын­дарының салтанатты рәсіміне қатысты.

Жеке орындаушылардың табыстары да аз болған жоқ. Облыстық фи­лар­монияның әртістері Асхат пен Ди­нара Таушевтар және Руслан Мұста­фин Түр­кияның Алания қаласында өткен «Global Art Competition» 2-ші ха­лық­аралық бай­қауының Гран-при ие­герлері және лауреат­тары атанды.

Өңірдің тамаша көріністері кино сала­­сындағы жобаларды жүзеге асыруға тартымды болып отыр. Кейінгі жылдары об­лысымызда «Мағжан», «Долгое эхо» және «Қара қыз» атты 3 көркем фильм тү­­сірілді. Өткен жылы дарынды режиссер Сәбит Ернат «Күлпәш» фильмін түсірді. «Мұндай жобалар алдағы уақытта да жал­ғасады», дейді Д.Әбдірайысов.

Облыстағы 321 кітапхананың ішінде С.Мұқанов атындағы әмбебап ғылыми кітапхананың атағы алысқа кеткен. Бұл еліміздегі халықаралық қордан грант алушы 26 кітапхананың бірі АҚШ, Франция және т.б. көптеген мем­лекеттердің ел­шілік­терімен тығыз жұмыс істейтін жал­ғыз кітапхана. Осы кітапхана арқылы біздің өңіріміз «Оқырманы озық өлке»  атағына ие.

Облыста 14 филиалы бар облыстық мемлекеттік архив жұмыс істейді, олар­дың қорларында Ұлттық мұрағат қо­рының 1 миллион 700 мыңнан астам құ­жаттары шоғырланған. Архивтік құ­жат­тар негізінде жыл сайын облыс архивтері 30 мыңнан астам мемлекеттік қызмет көрсетеді.

Осы жылы облыстық мәдениет бас­қар­­масының брендтік жобалары қата­рында Қожаберген жыраудың 360, Шал ақынның 275, Ақан серінің 180, Айғаным ханшаның 240, Мағ­жан Жұмабаев пен Сұлтанмахмұт Торай­ғыровтың 130 жыл­дығы аталып өтеді. Соның ішінде М.Жұ­мабаевтың 130 жылдығына ар­налған челлендж бас­талып кетті.

Сондай-ақ дәстүрге айналып кеткен «Qyzyljar Music fest» және Ермек Серкебаев атындағы халықаралық клас­сикалық музыка фестивальдерін өткізу жоспарланып отыр. Ал «Ботай – Ұлы дала мәдениеті» ІІ халықаралық сурет­шілер сим­позиумына қатысушылар Түр­кия, Франция және Нидерландтан келетін болады.

Солтүстік Қазақстан облысы