Astana Hub халықаралық технопаркі Түркі мемлекеттері ұйымы елдерінің үздік технологиялық стартаптарына әлемдік нарыққа, соның ішінде АҚШ нарығына шығуға мүмкіндік ұсынады. Осы мақсатта Astana Hub әйгілі Draper University-мен келісім жасасып, 20 әлеуетті стартапты Кремний алқабында Hero Training интенсивті бағдарламасы аясында дамытатын болды.
Ынтымақтастық туралы келісімге 2023 жылғы 10 наурызда Astana Hub бас директоры Мағжан Мәдиев пен Draper University президенті Asra Nadeem Сан-Матео қаласында (Калифорния штаты) Цифрлық даму, инновациялар және аэроғарыш өнеркәсібі министрі Бағдат Мусиннің АҚШ-қа ресми сапары барысында қол қойды.
– Мемлекет басшысы Қасым-Жомарт Тоқаев елдегі IT-саланың дамуына айрықша мән беріп, қолдау көрсетіп келеді. Осы ретте стартаптарымызға үздік әлемдік тәжірибені ұсынғымыз келеді. Кремний алқабында орналасқан Draper University қазірдің өзінде көптеген жас IT-компаниялар үшін табысқа жетудің катализаторына айналды. Өйткені ол жерде ресурстардың, капиталдың және халықаралық сарапшылардың бірегей үйлесімі бар. Бұл стартаптардың жылдам дамуына мүмкіндік береді. Ынтымақтастығымыз бағдарлама қатысушыларына өз бизнесін жаңа деңгейге көтеріп, жаһандық ауқымдағы кәсіпкерлікте бәсекеге қабілетті компанияға айналуға жол ашарына сенімдімін, – деді Бағдат Мусин.
Бағдарлама мынадай кезеңдерден тұрады: Бірінші – үздік 80 жоба өнімді әзірлеу және масштабтау, сондай-ақ халықаралық венчурлық қорлардан инвестиция тарту қағидаттары бойынша 2 апталық онлайн бағдарламаға қол жеткізе алады. Екінші – үздік 20 жоба тәжірибелі технологиялық кәсіпкерлер және сарапшылардың жетекшілігімен инвестиция тарту әрі АҚШ нарығына шығу үшін Кремний алқабындағы Draper University-де 6 айға дейін тегін баспана және жұмыс орнымен қамтамасыз етіліп, 5 апталық қарқынды бағдарламадан өту мүмкіндігіне ие болады.
Draper Ecosystem – инновациялық экожүйені қолдау үшін озық фасилитаторлар мен тәлімгерлердің, салалық сарапшылардың, корпоративтік серіктестердің және инвесторлардың теңдесі жоқ желісін ұсыну арқылы таланттарды, сарапшыларды және инвесторларды біріктірудің бірегей тәсілі. Draper University негізін венчурлық капитал бизнесінде 38 жылдық тәжірибесі бар Тим Драпер қалаған.
Hero Training бағдарламасына өтініш биылғы 7 сәуірге дейін қабылданады.