Атырау облысына алыс және таяу шетелден келетіндер көп. Тіпті осы өңірде тұрақтап қалуды көздейтін шетелдіктер де жетіп артылады. Олардың арасында еліміздің көші-қон заңдылығын бұзатындар, тіпті заңсыз жүретіндер кездеседі.
Облыстық полиция департаменті баспасөз қызметінің мәліметінше, заңды белден басқан шетелдіктер «Мигрант» жедел профилактикалық іс-шарасы кезінде жиі анықталады. Жақында Атырау облысында 900-ден астам шетелдіктің құжатсыз жүргені белгілі болды. Мәселен, 583 өзге елдің азаматы еліміздің көші-қон заңнамасын бұзғаны үшін Әкімшілік құқық бұзушылық туралы кодекстің 517-бабының 3, 4, 5, 6 және 7-бөлігімен әкімшілік жауапқа тартылған. Ал шетелдің 31 азаматына аталған құжаттың 519-бабымен, 372 заңсыз «қонаққа» 518-бабымен әкімшілік хаттама толтырылған. Сондай-ақ әкімшілік құқық бұзған 31 шетелдік азаматтық іс жүргізу және әкімшілік тәртібімен ел аумағынан шығарылды. Жеке басын анықтайтын құжаттардың болмауына байланысты Өзбекстан Республикасының 91 азаматы қабылдау-тарату орнына орналастырылды.
– «Мигрант» іс-шарасы кезінде Атырау қалалық полиция басқармасы №2 полиция бөлімінің учаскелік полиция инспекторы Нұрсұлтан Кеңесов құжатсыз жүрген 72 жастағы шетелдікті анықтады. Өзбекстан Республикасының азаматы Қазақстанға 2000-жылдары келіп, қазақстандық әйелмен отбасын құрған. Қазір ерлі-зайыптылардың ортақ бес баласы бар. Шетелдіктің айтуынша, сол жылдары азаматтық алу үшін құжат дайындамақ болғанымен, бұл істі соңына дейін жеткізбеген, – деп хабарлады департаменттің баспасөз қызметі.
Атырау қалалық полиция басқармасы көші-қон қызметі бөлімінің қызметкерлері елде болу заңдылығын бұзған егде жастағы өзбекстандыққа қатысты іс-құжаттарды жинақтады. Нақтылай айтқанда, 1951 жылғы шетелдіктің жеке басын анықтап, еліне қайтару үшін тиісті құжаттар тізбесін Өзбекстан Республикасының Ақтау қаласындағы консулдығына жолдады. Дәл осыған ұқсас дерек Қызылқоға ауданында анықталып отыр. Аудандық полиция бөлімінің учаскелік полиция инспекторы Қайырбек Қамаладенов әкімшілік аумақтағы тұрғын үйлерді тексеру кезінде өзбекстандық әйелді анықтап, көші-қон қызметі тобына жеткізді. Аталған топ қызметкерлері шетелдік әйелдің Қазақстан Республикасының аумағына 2010-жылдары кіргенін анықтады. Содан бері құжатының елде болу мерзімі біткенін біле тұра, Қазақстан аумағынан өз еркімен шығып кетпеген. Өзбекстандық әйел Қазақстан азаматына күйеуге шығып, заңды некеге отырған. Екі баланы дүниеге әкелген. Шетелдіктің түсіндіруінше, Қазақстан Республикасының азаматтығын алуға ниеті болған. Бірақ 13 жылдан бері азаматтық алуға қажетті құжаттарды толық жинақтап тапсырмаған.
Қазір көші-қон қызметі тобының қызметкерлері шетелдіктің көші-қон заңдылығын бұзғанына байланысты хаттама толтырды. Жинақталған іс-құжаттары Қызылқоға аудандық сотына жіберілді.
Атырау облысы