Президент Іс басқармасы Медициналық орталығының басшысы Алексей Цой мен Ақмола облысының әкімі Ермек Маржықпаев өзара ынтымақтастық меморандумына қол қойды.
Сөз басында іскерлік байланысты дамытуды мұрат тұтқан делегацияның біздің өңірге дейін Ақтөбе облысы мен Шымкент қаласында болғанын айта кетелік. Алексей Цой өз сөзінде еліміздің өзге өңірлерінде де осындай маңыздағы іс-шаралар жыл соңына дейін жалғасатынын айтып өтті. Елді елең еткізген сапардың басты мақсаты – аурудың алдын алу, диагностикалау және емдеу мен жалпы сауықтыру саласында тәжірибе алмасу.
Делегация құрамында орталықтың және орталық клиникалық аурухананың жоғары білікті мамандары бар. Олар өңірдің емдеу мекемелерінде шеберлік сабақтарын өткізіп, практикалық және консультациялық-әдістемелік көмек көрсетуде. Орталықтың жетекші мамандары өңірдің 340 тұрғынына тегін медициналық көмек көрсетуді жоспарлап отыр.
Жиын барысында өңір басшысы облыстағы медицина саласының ахуалы туралы баяндаса, орталықтың атқарып жатқан аумақты жұмыстары жайында Алексей Цой таратып айтып берді. Мұнан соң орталық клиникалық аурухананың президенті Асхан Бралов баяндама жасады. Президент Іс басқармасы Медициналық орталығы ауруханасының директоры Рустам Албаев өз пікірін ортаға салып, алдағы ауқымды жұмыс туралы тәптіштеп түсіндірді. Мұнан соң екі жақ өзара ынтымақтастық меморандумына қол қойды.
Енді медициналық орталықтың қызметкерлері өз тәжірибелерімен, саладағы соны жаңалықтармен бөліспек. Қазірдің өзінде бірлесе атқаратын 33 іс-шара жоспарланып отыр. Жиын соңында құрметті қонақтардың қатысуымен көпбейінді облыстық аурухананың құрылысы таныстырылды. Сондай-ақ делегация облыс орталығындағы медициналық мекемелердің материалдық-техникалық базасымен танысты.
КӨКШЕТАУ