Волейболдар «Павлодар» ерлер клубы өз тарихында алғаш рет ел чемпионатының жеңімпазы атанды. Финалда Қазақстанның былтырғы үздігі – «Атырауды» жеңіп, жеңіс тойын тойлады.
Белгілі маман Игорь Никольченко жаттықтыратын «Павлодар» волейбол клубы Павлодардағы «Баянтау» спорт сарайында өткен финалдық ойындарда бірнеше кездесу өткізіп, алтын жүлде үшін таласта «Атыраумен» кездесті. Ақтық сында азулы қарсыласпен екі ойынның қорытындысында 10 партия өткізіп, 3:2, 3:2 есебімен басым түсті. Сөйтіп, алтын жүлдені олжалап, жерлестеріне тамаша сый жасады.
Бұл – клуб тарихындағы алғашқы алтын. Жарыстың негізгі бөлігін үшінші орынмен тәмамдаған жергілікті команда плей-оффта Алматының «Буревестник» клубын жеңген еді. Ал «Атырау» былтырғы Ұлттық лиганың жеңімпазы болғандықтан, соңғы ойынның салмағы ауыр болғаны түсінікті. Осылайша, Қазақстанның волейбол картасында Павлодар қаласы чемпион болған тоғызыншы команда ретінде тіркелді.
Турнирдің қола жүлдесі үшін болған ойында алматылық «Буревестник» былтырғы жетістігін тағы қайталап, жүлдегерлер сапынан көрінді. «Тараз» өткен жылғыдай жүлдесіз қалды.
Керекудің ерлер командасы сөйтіп, өз тарихында тұңғыш рет ең жоғары жетістікке жетіп отыр. Кезінде Павлодардың аруларынан құралған «Пульс» клубы 1995 жылы, ал «Ертіс» командасы 1997 және 1998 жылдары ел біріншілігінде топ жарған еді.
ПАВЛОДАР