Қазақтар мен корейлер бірігіп кино түсіруге келісті

Елімізде «MG Production» мен Оңтүстік Кореядағы атақты «Плюс F» кинокомпаниясы ұзақ мерзімді келісімшартқа қол қойды Екінің бірі елімізде «MG Production» деп аталатын кинокомпанияның бар екендігін білмесе де, бір қауым көрермен осы компания түсірген «Елес қуған сайыпқыран», «Обратная сторона», «999», «Ана жүрегі» деп аталатын картиналарды көрген. Сонымен, Қазақ­­­стандағы аталмыш компания Оңтүс­­тік Кореядағы атақты «Плюс F» компаниясымен көркем фильмдер мен телесериалдар түсі­ру туралы ұзақ мерзім­ді әріптестік келісім­шарты­на қол қойды. Мәселен, «Плюс F» кинокомпаниясы өз елінде табысты телесериалдар мен көркем фильмдер түсіруге әбден машықтанған, абыройлы картиналар жасаумен аты шыққан кинокомпаниялардың бірі. Осынау кинокомпания түсірген талай картиналар халықаралық кинофестивальдердің лауреаты атанған. Ал Қазақстандағы «MG Pro­duction» кинокомпаниясының да аяқ алысы жаман емес. Биыл жыл басында «Елес қуған сайып­қыран» атты ғылыми фантас­тикалық элементтері бар көркем фильмді бірден екі тілде тарту еткені оқырманға аян. Шындығында, жаңа фильм экшн жанрын жақсы көретін көрермендердің көңілінен шық­қан-ды. Алғашқы қазақ блокбас­тері ауқымды спецэффектілері­мен, сапалы графикасымен де ерекшеленді. – Бұл – кинематография сала­сында екі елдің бірігіп жұмыс істеуінің бірінші мысалы. Оңтүстік Кореяның теле және ки­ноөнімдері Азия мен ТМД елдерінде үлкен сұранысқа ие. Біз қолға алған бастама қазақ­стандық-кореялық киножобаларды жаңа рынокқа шығаруға көмектеседі, – дейді «MG Produc­tion» кинокомпаниясының бас директоры Ернар Мәліков. Ернар Мәліковтің айтуынша, бұл қадам Қазақстан мен Оңтүстік Корея арасына тартылған мәдени көпірді мемлекеттік деңгейде ғана бекемдеп қоймай, қазақтар мен корейлерді жақындастыра түсудің игі амалдары болып табылады. – Біздер екі елдің мәдениет­терін, тарихи құндылықтары мен әдет-ғұрыптарын бір-біріне бұ­рынғыдан да түсінікті етіп, жа­қындастыра беруді де ниет етіп отырмыз, – дейді қазақстандық кинематограф. Қысқасы, келісімге келген екі кинокомпания өз жобаларын жүзеге асыру үшін мемлекеттік телеарналар мен киностудиялар­дың көмегіне сүйеніп және жеке демеушілер тартуды көздеп отыр. Мұндай жобалар – кино және телесериалдар түсіру өндірісі Қазақстан үшін коммерциялық тұрғыда тиімді болуына септеседі деп ойлайды киногерлеріміз. Айнаш ЕСАЛИ, «Егемен Қазақстан». АЛМАТЫ.